DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial OFX, tanba komete krimi hasoru lezada ho inisial CS.
Tuir faktus neebe tribunal lee sai iha Kuarta (01/10/2025) katak, loron fulan la apuradu maibe tinan 2021, iha Tuana Laran arguidu haruka lezada ba buka uma kos hodi sira hela, maibe lezada la kohi.
Tanba nee maka arguidu lori kapasete baku dala rua ba iha lezada, no lori liman tuku ba iha lezada nia ulun.
Konsekuensia husi arguidu nia hahalok nee, halo lezada sente moras iha fatin atinjidu.Tanba nee Ministeriu publiku akuza arguidu komete krimi Violensia Domestika ho Forma Ofensa Integridade Fisika Simples neebe previstu iha artigu 145 husi Kodigu Penal.
Hatan ba akuzasaun nee, iha sala julgamentu laran arguidu katak, baku lezada tanba momentu neeba telefone lezada maibe lezada taka tiha telefone mate, laos tanba haruka ba buka kos maka baku.
Arguidu deklara, sira nia oan moras hela, maibe lezada la hare, husi ida nee maka mosu diskusaun to ikus mai mosu problema.
Arguidu mos deklara tan, agora sira fahe malu, no arguidu mos moris hamutuk ho feto seluk ona.
Arguidu mos rekonese, lori kapasete baku lezada, alende lori liman tuku ba iha lezada nia ulun.
Alende nee lezada katak, momentu neeba arguidu lori kapasete baku lezada, halo lezada monu. No agora sira fahe malu ona, lezada mos moris hamutuk ho mane seluk ona.
Rona tiha lezada no arguidu, Tribunal deside tama kedan ba iha faze alegasaun.
Iha alegasaun MP haree katak, arguidu konfesa ba faktus neebe iha, tanba nee husu Tribunal atu aplika pena multa. Enkuantu husi parte defeza nian, aseita ho pedidu MP nian.
Ikus mai Tribunal hare katak, iha alterasaun substansial depois de problema sira nain rua fahe malu ona, no ida idak forma nia familia ona.
Tribunal hare katak, iha kazu ida nee arguidu hato nia konfensaun imparsial katak, lori kapasete baku dala ida, no arguidu nega la tuku ida.
Maibe lezada katak, arguidu laos lori kapasete baku deit, maibe lori liman tuku mos.
Tribunal haree katak, sei razoavel deklarasaun neebe lezada hato no matein nafatin deklarasaun sira uluk, tanba nee Tribunal fo fiar katak, akontese duni violensia ba ofendida.
Ikus mai Tribunal deside hodi aplika pena multa US$ 90, se arguidu la kumpri desizaun Tribunal nian, sei tama iha kadeia durante loron 60.
Audensia julgamentu nee, prezide husi Juiz Ana Paula, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku.
Jornalista: Terezinha De Deus
Editora: Domingas Gomes
