DILI, STLTIMORLESTE.com – Ministeriu Publiku (MP) halao alegasaun ba kazu taa lezadu inisial JN, neebe komete husi arguidu nain tolu (3) inisial FCB, OCAdCG no LRCG iha Metiaut..
Iha sala julgamentu laran Prokurador Hernani Rangel deklara katak, prosesu ida nee iha arguidu FCB, OCAdCG no LRCG.
Prokurador deklara, Ministeriu Publiku (MP) akuza arguidu FCB ho krime Arma Brankas no Tentativa omisidiu iha produsaun de provas arguidu konfesa, lori katana tao duni lezadu JN.
Prokurador deklara, arguidu OCAdCG lori liman tuku no arguidu LRCG lori fatuk tuda tau hamutuk forsa, maibe sira nia grau de ilisitu la hanesan, no arguidu nain rua nia kastigu la hanesan ho arguidu FCB.
MP deklara katak, se arguidu nain rua la lori fatuk tuda no la lori liman tuku, lezadu bele halai liu. Maibe ho arguidu nain rua nia forsa ida tuda, ida tuku mak halo lezadu monu no ikus mai arguidu FBC hodi lori katana taa lezadu.
Prokurador prosesu nee deklara, arguidu nain tolu konfesa ba faktus, ida nee sai mos hanesan atenuantes ba sira.
Ikus mai MP deklara katak, arguidu FCB komete duni krime Tentativa omisidiu no Arma Branka, tanba nee husu Tribunal atu kondena arguidu ho pena prizaun efetivu tinan 7.
Mezmu nunee, arguidu OCAdCG, LRCG Prokurador deklara, sira nain rua nia aktu priense duni ba krime neebe akuza, tanba nee husu Tribunal atu kondena arguidu nain rua ho pena prizaun efetivu tinan 3 fulan 6.
MP deklara, husu Tribunal julga prosedente provadu ba akuzasaun hodi kondena arguidu sira.
Enkuantu defeza husi arguidu sira nian deklara katak, problema nee akontese iha momentu neeba arguidu nain 13 mak hemu hela tua. Maibe ikus mai MP produs akuzasaun akuza deit arguidu nain tolu.
Defeza reklara katak, arguidu sira nia aktu la prense ba krime neebe maka konsta iha akuzasaun. Tanba nee defeza husu Tribunal krime neebe akuza ba arguidu FCB, atu halo alterasaun Kualifikasaun Juridiku ba iha krime Ofensa Integridade Fisika Grave.
No krime neebe akuza ba arguidu nain rua OCAdCG, LRCG defeza husu Tribunal atu halo Alterasaun Kualifikasaun Juridiku ba iha krime Ofensa Integridade Fisika Simples.
Rona tiha alegasaun, Tribunal adia ba loron seluk hodi tama ba iha leitura akordaun.
Iha indisus sufisiente katak, iha loron 19 fulan Novembro tinan 2024, iha oras mais ou menus 01h00 madrugada, iha Metiaut Dili, momentu neeba arguidu sira maka hanesan, FCB, OCAdCG, LRCG, hamutuk ho kolega sira seluk hemu hamutuk tua iha area Cristo Rei nian.
No bainhira arguidu sira hemu hela tua, lezadu mos hemu tua hamutuk ho arguidu sira. Hafoin lanu ona, lezadu komesa tolok ona arguidu sira, hafoin lezadu mos fila tiha ba uma.
Bainhira lezadu fila tiha ba uma, nunee arguidu sira mos ho kondisaun lanu todan, fila mos ba uma neebe maka lokaliza iha Metiaut.
Bainhira arguidu sira too iha Metiaut, lezadu ho nia grupo mos fila fali mai iha Metiaut hodi tuda malu ho arguidu sira.
Bainhira iha tuda malu arguidu LRCG uza fatuk ida hodi tuda kona kedas iha lezadu nia ibun, nunee kauza kanek no halo mos lezadu monu kedas ba rai.
Bainhira lezadu monu ona iha rai, arguidu OCAdCG uza liman hodi tuku kona kedas lezadu nia ulun kauza moras, hafoin arguidu FCB ho kondisaun lanu todan, foti katana ida hodi taa kedas iha lezadu nia ulun nomos taa tan dala ida iha kotuk laran, kauza lezadu hetan kanek no raan sai barak, hafoin lezadu mos monu kedas ba rai.
Motivu husi problema nee, tanba entre lezadu ho arguidu sira asalta malu tanba arte marsiais.
Konsekuensia husi arguidu sira nia hahalok nee maka halo lezadu hetan kanek iha ibun, kanek iha ulun, no kotuk laran, tanba hetan asalta husi arguidu sira ho fatuk, liman no katana, nunee halo lezadu hetan tratamentu iha HNGV.
Arguidu sira halo ho forma livre, deliberada, no konsiente, hatene hela katak, lori fatuk hodi tuda, uja liman hodi tuku no uja katana hodi taa, bele halo kanek no bele hamate ema seluk nia vida (arguidu sira tau hamutuk sira nia forsa) no kaer katana hodi taa arguidu sira iha posse ba armas e tuir lei Penal bandu, maibe arguidu sira halo nafatin sira nia hahalok nee, hanesan meius ou instrumentu ida neebe maka aptu no adekuadu.
Arguidu sira mos hatene hela katak, sira nia konduta nee tuir lei penal bandu.
Tanba nee, arguidu nain tolu hanesan ko-autoria material, ba pratika krime Tentativa Homesidu no krime Arma Branka.
Prosesu nee, prezide husi Juiz Kolektivu, Jose Quintao, Jose Gonsalves, Jumiati Freitas, Ministeriu Publiku reprezenta husi Prokurador Hernani Rangel, arguidu hetan asistensia legal husi Advogadu Privadu nain ida.
(ter)
