DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial MSL, tanba halo agresaun hasoru nia feen lezada ho inisial DASS.
Iha sala julgamentu laran, loron Kinta Juiz prosesu Francisca Cabral lee sai akuzasaun katak, iha loron 27/08/2024 haleu oras tuku 18:30 OTL, iha Aimutin Dili, arguidu MSL foti korenti motor nian hodi baku ho makaas dala ida kona iha ofendida nia kelen hun sorin karuk, kaer fuuk baku oin ba rai tuku ho liman kona iha ulun fatuk sorin karuk no tuku ho liman kona iha ofendida nia ulun fatuk sorin los.
Konsekuensia direta ho arguidu nia hahalok ofendida hetan moras makaas iha kelen hun sorin karuk bubu no metan no kanek kuaze 10X12 senti metru.
Kauza husi problema nee tanba ofendida ba buka tuir arguidu no ofendida halo asaun fizika uluk hasoru arguidu mak arguidu hodi halo asaun fiziku hasoru ofendida.
Iha loron 28 fulan Agostu tinan 2024, haleu oras 01:00 OTL, iha Aimutin, Dili, MSL nervozu lori liman rua buti ofendida nia kakorok, tuku dala rua kona iha ofendida nia ulun fatuk, arguidu dudu ofendida monu ba rai, lori ain sama iha ofendida nia kotuk no kontinua kaer ofendida nia ulun baku ba rai, halo ofendida sente oin nakukun no muta.
Konsekuensia direta husi arguidu nia hahalok ofendida hetan moras makaas iha kakorok, dada iis araska, moras makaas iha ulun fatuk, bubu no kanek nakles iha rentos.
Kauza husi problema nee tanba ofendida lori telemovel tuda uluk arguidu, tanba nee mak arguidu hodi halo agresaun fiziku hasoru ofendida.
Arguidu MSL halo ho forma livre, deliberada no konsientemente, hatene katak foti korenti motor nian hodi baku ho makaas dala ida kona iha ofendida nia kelen hun sorin karuk, kaer fuuk baku oin ba rai, tuku ho liman kona iha ulun fatuk sorin karuk no tuku ho liman kona iha ofendida nia ulun fatuk sorin los, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Konstitui arguidu MSL nuudar autor material ho forma konsumadu ba pratika konkursu krimi ofensa ba integridade fizika simples ho forma violensia domestika 2 (rua), previstu no punidu tuir artigu 145 husi Kodigu Penal konjuga ho artigu 35º husi Lei Kontra Violensia Domestika n. 207/2010 loron 07 fulan Julhu.
Hatan ba akuzasaun neebe iha, arguidu deklara katak, faktus neebe iha loos hotu no arguidu rekonhese lezada hanesan ema neebe deskonfia dor, tanba nee mak ikus mai diskuti malu no mosu problema.
Arguidu deklara, mosu tiha problema lezada sai tiha husi uma ba iha lezada nia inan no aman sira nia uma, depois arguidu husu fali deskulpa rezolve tuir familia nian, tanba nee mak lezada fila fali mai uma.
Arguidu deklara, hahu husi neeba too mai agora la iha tan problema ona.
Lezada mos haforsa tan akuzasaun katak, arguidu halo duni agresaun hasoru lezada, maibe hahu husi neeba too mai agora la iha tan problema ona.
Rona tiha arguidu no lezadu, iha alegasaun Prokurador Napoliao da Silva husu Tribunal atu aplika pena prizaun tinan 3 suspende tinan 4 ba arguidu. Enkuantu husi parte defeza Manuel Exposto husu Tribunal atu aplika pena multa ba arguidu.
Rona tiha alegasaun Tribunal adia ba loron seluk hodi rona desizaun.
Audensia julgamentu nee prezide husi Juiz Francisca Cabral, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
