DÍLI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial CFX, tanba lori liman buti feen ka lezada ho inisial MDS nia kakorok too monu ba rai.
Iha sala julgamentu laran, Juiz prosesu Ivan Suritai lee sai akuzasaun katak, iha loron 26 Outubru 2023, arguidu ba hela iha Bebonuk nia kolega nia uma, tanba nee lezada mos buka tuir arguidu too iha fatin neeba.
Too iha neeba, lezada bolu arguidu atu fila mai sira nia uma, maibe arguidu hamriik mai diretamente kaer lezada nia liman buti makaas halo lezada monu ba rai.
Motivu husi problema nee tanba arguidu lakohi hola lezada no hakarak hola fali feto seluk.
Konsekuensia husi arguidu nia hahalok nee halo lezada sente moras hodi hatoo keixa.
Tanba nee, Ministeriu Publiku akuza arguidu komete krime Violensia Domestika ho forma Ofensa Integridade Fizika Simples neebe previstu iha artigu 145, Konjuga ho lei Violensia Domestika.
Hatan ba faktu neebe iha arguidu deklara katak, faktu neebe iha loos hotu, lezada ba buka duni arguidu no arguidu lori liman buti lezada.
Arguidu deklara, sira hola malu dezde tinan 2021 iha oan nain ida no konsege hela hamutuk, no sira fahe malu iha tinan 2022.
Arguidu mos deklara, agora arguidu seidauk hola feto seluk ida, no haree deit labarik la iha ona relasaun ho lezada.
Arguidu konfesa ba faktus, tanba nee Tribunal deside la rona tan lezada nia deklarasaun.
Iha alegasaun Prokurador Hernani Rangel mantein ho akuzasaun neebe iha, husu Tribunal kondena pena multa ba arguidu.
Enkuantu husi parte Defeza, Jose Maria Guterres mos aseita ho alegasaun MP nian, maibe husu Tribunal atu aplika pena multa neebe kmaan ba arguidu.
Rona tiha alegasaun, adia ba loron seluk hodi rona desizaun.
Audensia julgamentu nee prezide husi Juiz Singular, Ivan Suritai, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku, Jose Maria Guterres.
(ter)
