DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial MJM, neebe tenta lori rama ambon hana lezadu nain rua.
Tuir akuzasaun neebe Juiz prosesu lee sai iha loron Kuarta nee katak, iha loron 28 fulan Outubru tinan 2017, oras tuku 05:00 Otl, iha Aldeia Temporal Lahane, Dili, lezadu AB ho lezadu DLS oho hela karau iha nia aman nia mate loron 40 nian, derepente arguidu MJM mosu hamutuk ho nia grupu deskonhesidu sira, halo atake hasoru lezadu nia familia.
Nunee lezadu ho nia kolega sira defende aan, no arguidu MJM neebe oin taka metin ho hena, lori rama ambon neebe kaer hela hodi hana ba lezadu DLS no AB too dala hitu, maibe la kona, tanba lezadu sira salva aan.
Hafoin Polisia too halo atuasaun hodi rekolha provas sira. Konsekuensia husi arguidu nia hahalok nee, halo lezadu sira sente tauk no trauma.
Motivu husi problema nee tanba lezadu sira dun arguidu neebe hanesan membru 77, buan manas no kaer ai kulit aat.
Arguidu komete krimi nee ho voluntariu, livre no konsientemente, arguidu hatene katak hahalok lori rama ambon hodi hana lezadu sira nuudar hahalok neebe lei bandu, maibe arguidu halo nafatin hodi kontra.
Tanba nee, Ministeriu Publiku akuza arguidu komete krimi Arma Branka neebe previstu iha lei numeru 5/2017.
Hatan ba akuzasaun neebe iha, arguidu deklara katak, faktus neebe konsta iha akuzasaun lalos. Arguidu deklara, momentu mosu problema arguidu la iha fatin, tanba arguidu iha hela Aldeia Tuba Rai hodi akompanha festa ida.
Arguidu deklara, ema deskonhesidu neebe halo ataka ba lezadu nain rua, ida nee arguidu la iha konhesimentu, no laos arguidu mak kaer rama ambon hodi hana ba lezadu sira.
Arguidu dehan tan, lezadu sira la gosta arguidu, mak lezadu sira keixa katak arguidu mak halo asaun nee. Arguidu rekonhese envolve iha grupu 77, maibe laos arguidu mak kesi oin hodi ba hana lezadu sira.
Rona tiha arguidu nia deklarasaun, Tribunal adia ba loron seluk hodi rona deklarasaun husi lezadu nain rua.
Audensia julgamentu nee prezide husi Juiz Kolektivu, Ana Paula, Ersilia de Jesus, Jose Maria, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Defensor Publiku Joao de Carvalho.
(ter)
