DILI, STLTIMORLESTE.com – Tribunal Judisial Primeira Instansia Dili liu husi desizaun ikus kondena arguidu ho inisial AF pena suspensaun.
Iha sala julgamentu laran loron Tersa (11/03/2025) Juiz Prosesu Arjentino Nunes deklara katak, Tribunal Julga provadu ba iha krimi neebe Ministeriu Publiku akuza, krimi Arma Branka no sem karta kondusaun.
Tribunal tetu sirkunstansia hotu, Tribunal deside ba iha krimi Arma Branka kondena arguidu pena prizaun tinan 1 fulan 3, suspende ba tinan 1 fulan 3.
Ba krimi kondusaun sem karta, Tribunal kondena arguidu ho pena multa US$ 60. Tribunal mos deklara arguidu la selu multa, arguidu sei kumpri prizaun durante loron 80.
Tuir akuzasaun neebe iha katak, iha loron 31 fulan Dezembru tinan 2018, hahu oras tuku 21h55 OTL, testemunha ajente JJ halao hela nia knaar hodi kontrola movimentasaun sarani sira nebe mai partisipa serimonia misa tinan foun iha Igreja Balide Dili.
Husi parte sorin Seminariu Menor Balide testemunha haree ema barak hamutuk iha neeba, nunee testemunha ajente JJ hakbesik hodi identifika saida mak akontese, la kleur arguidu AF mai ho motorizada husi diresaun Eskola Português, ho velosidade makaas hodi soke MA, arguidu monu ho motorizada hamriik mak losu tudik husi nia kanotak la hatene hodi atu halo aksaun saida.
Haree ida nee testemunha hanesan ajente PNTL detein kedas arguidu hodi pasa revista, rekolha evidensia tudik oan husi nia liman.
Arguidu mos konduz motorizada sem karta kondusaun.
Arguidu halo hahalok nee ho konsiente livre, deliberada, hatene katak lori sasan kroat (samurai no rama ambon) hanesan meius neebe aktu hodi viola lei.
Arguidu hatene katak nia hahalok sira deskreve iha faktu ida nee nuudar hahalok krimi neebe lei bandu, maibe kontinua halo.
Nunee konstitui arguidu AF hanesan autoria material ho forma konsumada ba krimi detensaun ba armas branka ou lori sasan kroat tuir artigu 19 numeru 1 no lei numeru 5/2017. datada 19 Abril no kondus motorizada sen karta kondusaun iha artigu 207 Kodiku Penal.
Hatan ba akuzasaun neebe iha, arguidu deklara katak, momentu neeba arguidu ho kondisaun lanu, no arguidu rekonhese konduz duni motor ida maibe la iha karta kondusaun.
Arguidu rekonhese sikat tudik ida iha kanotak, razaun atu defende aan kuandu hasoru problema ruma, no momentu neeba arguidu konduz motor haree polisia ida hamriik hela, halo arguidu tauk hasai tudik neebe iha kanotak hodi soe tiha ba kareta okos, ho ida nee mak Polisia nee haree hodi detein kedan arguidu.
Arguidu deklara, lori tudik laos intensaun atu buka ema ba sona, maibe lori deit atu defende aan.
Arguidu mos rekonhese laos foin primeira vez ba iha Tribunal, maibe antes nee mos tama ona iha prizaun tinan 1 fulan 2, ba kazu neebe akontese iha UNDIL nian oin.
Tribunal rona fali JJ hanesan ajente PNTL deklara katak, momentu neeba nia hetan orientasaun atu fo seguransa ba sarani sira neebe akompanha misa, depois misa sai sasin nee haree ema hamriik barak iha fatin ida, sasin nee hakbesik ba hodi husu tuir ema hamriik haree saida, maibe la iha ema ida koalia hodi fo hatene ba sasin.
Tanba nee, sasin kontinua lao fali mai oin, derepente arguidu konduz motor ida mai, losu tudik iha kanotak hodi soe ba iha kareta okos, sasin haree no detein kedan arguidu.
Rona tiha arguidu no sasin, iha alegasaun Prokurador Domingos Barreto mantein ho akuzasaun neebe iha, husu Tribunal atu kondena arguidu ba krimi Arma Branka ho Pena Suspensaun no ba krimi sem karta kondusaun ho pena multa.
Enkuantu husi parte defeza husu Tribunal tetu sirkunstansia sira hotu, hodi aplika pena neebe justu ba arguidu.
Audensia julgamentu nee prezide husi Juiz Koletivu, Arjentino Nunes, Zulmira Auxiladora, Ivan Suritai, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku, Sergio Dias Quintas.
(ter)
