DILI, STLTIMORLESTE.com – Ministeriu Publiku iha alegasaun ba krimi omisidiu ho forma tentada no krimi Arma Branka, solisita ba iha Tribunal Koletivu atu kondena arguidu ho inisial VP.
Iha sala julgamentu laran loron Tersa nee, Prokuradora Bemvinda do Rozario deklara katak, arguidu komete krimi rua hasoru lezadu JP, maibe iha sala julgamentu laran arguidu deklara katak, lezadu baku uluk arguidu mak arguidu sona lezadu.
Prokuradora deklara, lezadu dehan tan deit joga mak diskuti malu, ikus mai arguidu lori tudik sona iha lezadu nia hirus matan. Tanba nee Ministeriu Publiku haree katak, arguidu ho intensaun atu sona lezadu, maibe la konsege.
Ho nunee, MP mantein ho akuzasaun neebe iha, hodi husu Tribunal atu aplika pena prizaun tinan 8 ba arguidu.
Enkuantu husi parte defeza nian husu Tribunal atu tetu sirkunstansia hotu, atu aplika desizaun ida neebe justu ba arguidu.
Rona tiha alegasaun nee, Tribunal adia ba loron seluk hodi rona desizaun.
Tuir akuzasaun neebe iha katak, lezadu JP hetan konvite husi festa nain katak, iha loron 08 fulan Agostu 2017, kalan iha festa koremetan ida iha area Darulete-Likisa, nunee lezadu bele ba loke bola guling iha neeba.
Nune lezadu mos halo tuir hodi ba loke bola guling iha neeba, no iha loron 09 fulan Agostu 2017, oras tuku 05:00 dadersan, derepente arguidu VP mosu ba losu sai tudik husi nia kanotak, la koalia buat ida, sona kedas ba lezadu JP nian hirus matan, rezulta kanek no raan sai barak no monu ba rai dezmaia kedas.
Arguidu kontinua hodi tudik nee atu sona mate lezadu maibe, Alberto ho Manuel kaer arguidu hodi entrega ba polisia.
Tanba lezadu hetan kanek todan, nunee ambulansia transporta kedas lezadu ba iha hospital Likisa, maibe tanba lezadu nia kanek grave, transfere fali lezadu ba iha Hospital Nasional Guido Valadares (HNGV) hodi internadu durante fulan ida ho balu.
Ho konsekuensia husi kanek neebe lezadu hetan ate agora lezadu ho kondisaun la normal no labele kaer servisu.
Arguidu VP komete krimi nee ho livre delibarada no konsientemente, arguidu hakarak hasai lezadu nia vida liu husi meius hodi tudik sona ba lezadu nia hirus matan, maibe lezadu hetan tratamentu iha hospital hodi konsege salva lezadu nian vida. Arguidu mos hatene katak utiliza tudik hodi halo krimi nuudar hahalok neebe kontra lei maibe arguidu halo nafatin hahalok hirak nee hodi kontra lei.
Tanba nee mak Ministeriu Publiku akuza arguidu komete krimi Arma Branka no omisidiu ho forma tentada.
Audensia julgamentu nee prezide husi Juiz Koletivu, Jose Escurial, Fransisca Cabral, Afonso Carmona, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Advogadu Privadu nain rua.
(ter)
