DILI, STLTIMORLESTE.com – Loron masakre Santa Kruz 12 Novembru 1991, sai loron importante ba jerasaun foun sira, oinsa bele hamutuk hodi luta ba libertasaun povu atu moris ho bem-estar
“Istoria 12 Novembru ida nee, mane no feto maluk Timoroan barak mak oferta nia aan hodi liberta nasaun, ikus rejiste katak Timor Leste hetan duni independensia liu husu pregu,” dehan Diretor Ezekutivu husi Luta Hamutuk (LH), José Alves da Costa ba STL, iha Farol, Dili, Tersa (05/11/2024).
Nia dehan, loron istoria 12 Novembru 1991 TL selebra atu ba dala-tolunulu resin tolu (33), nunee husu ba jerasaun foun sira atu hadomi malu, lao hamutuk, lao tuir dalan neebe uluk loriku asuwain Timoroan halo hasoru invazor sira.
Tanba luta neebe uluk juventude rezistensia 12 Novembru sira halo la haree ba kor, partidu, rasa, grupu, maibe sempre kaer liman hamutuk, ho objetivu ida deit, luta ba ukun rasik aan, realidade hatudu duni rezultadu ba independensia.
“Ita haree katak loron ida nee importante tebes, liu-liu loron 12 Novembru 1991, ema juventude, feto mane, ferik no katuas barak mak mate, no eferese nia vida tomak, biar mate, maibe konfidensial nafatin katak, loron ikus TL sei ukun aan,” dehan nia.
Entretantu hanesan Jerasaun patriota, Olivio Garnacho Freitas katak, masakre Santa Kruz 12 Novembru 1991, nee sai istoria importante tebes ba jerasaun foun sira atu banati, katak uluk luta neebe iha konsege liberta ona patria, luta ba ohin tenke hanoin atu liberta fali ba povu nia moris.
Tanba juventude rezistensia barak mate, tanba hakarak ukun aan, ofere nia aan ba bala musan, hakarak moris livre husi invazaun tantu kolonializasaun, realidade hatudu independensia, mezmu povu patriota liu-liu loron 12 Novembru joven barak mate, tanba ho objetivu tenki ukun rasik aan.
(EST 2)
