DILI, STLTIMORLESTE.com – Primeiru Ministru Malazia, sei vizita Timor Leste (TL) iha loron 23 too 24 Setembru tinan nee.
Primeiru Ministru, Kay Rala Xanana Gusmão dehan, Timor Leste tama Association of Southeast Asian Nations (ASEAN), apoiu makaas husi Primeiru Ministru Malazia, tanba nee PM Malazia sei vizita TL iha loron 23-24 Setembru nee.
“Ita atu tama ASEAN ho apoiu boot husi Primeiru Ministru Malazia, Dato Sria Anuar Ibrahim nia atu mai iha loron 23-24 Setembru nee mai halo vizita ofisial mai Dili. Neemak ami konkorda malu tiha ona, ekipa konjunta ida husi Prezidensia Republika, MNEK, ho Polisia Militar,” dehan PM Xanana ba jornalista bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Kinta (04/09/2025).
Nia hatete, TL tama ASEAN apoiu makaas husi Primeiru Ministru Malazia, Dato Sria Anuar Ibrahim, no PM Ibrahim mos sei vizita TL iha setembru nia laran.
Primeiru Ministru afirma, konaba vizita PM Malazia mai TL, Governu kria ona ekipa ida oinsa bele simu PM Malazia tanba mai loron 2.
“Hau nia gabinete sei servisu hamutuk, tanba Primeiru Ministru Malazia, Dato Sria Anuar Ibrahim nia mai loron rua deit. Simu Primeiru Ministru Malazia, Dato Sria Anuar Ibrahim nian, nia mai 23 no loron 24 nia fila fali. Kona-ba ajenda ba vizita sira nee, depois mak sei fo sai ba ita boot sira,” katak PM Xanana.
Iha biban nee Primeiru Ministru informa, Prezidente Republika katak Setembru sei hahu planu konsulta publika online kona-ba polítika no planu asaun ba ekonomia azul, hahu loron 9 Setembru nee.
Jornalista: Emerenciana Pinto
Editora: Domingas Gomes
