DILI, STLTIMORLESTE.com – Loron 3 Dezembru nuudar loron importante hodi selebra tinan ba Ema ho Defisiensia (EHD) sira iha mundu tomak, oinsa bele ikluziva oportunidade hodi harii sosiedade ida neebe reziliente iha futuru.
“Ita selebra loron 3 Dezembru EhD iha mundu dala barak ona Timor Leste hahu selebra iha 2008 too agora, tanba loron ida nee importante tebes ba ema ho defisiensia sira hodi festeza loron ida nee ho diak,” dehan Diretor Ezekutivu Asosiasaun Defisiensia Timor Leste (ADTL), Sezario da Silva ba jornalista sira iha Ministeriu Juventude Desportu Arte no Kultura (MJDAK), Lesidere Dili, Tersa (03/12/2024).
Tuir nia, selebrasaun loron ema ho defisiensia ida nee mai ho tema ida katak hakbiit ba ema lideransa ho defisiensia ba futuru neebe sustentavel no inkluzivu, entaun tema ida nee hafanu, oinsa bele empodera liu tan ema lideransa ho difisiensia sira.
Tanba selebrasaun nee importante, entaun nee organiza direta husi Governu liu husi Ministeriu Soliriedade Sosial no Inklusaun (MSSI) hamutuk ho Autoridade Munisipiu Dili (AMD) no Asosiasaun Difisiensia Timor Leste (ADTL) hamutuk hodi selebra loron espesial ida nee ba ema ho difisiensia iha teritoriu Timor Leste tomak.
Entretantu ema ho defisiensia, Nelson Barros Pereira Xavier hatete, apresia tebes ba loron importante ida nee, nudar loron rekonesimentu international ba ema ho defisiensia sira atu bele barani foti desizaun, nuudar ema lideransa ho defisiensia sustentavel no inkluzivu iha futuru
Tanba nee husu ba Governu labele apoiu ema defisiensia iha loron sorin no loron seluk haluha harii kondisaun dignu ba ema ho defisiensia, tanba ema ho defisiensia sai ema sidadaun ida neebe diak iha sosiedade, tanba nee husu atu fo apoiu no responsabilidade masimu ba ema ho difisiensia sira iha Timor Leste.
Nunee mos Sekretariu Estadu Toponomia no Organizasaun Urbana (SEATOU), Germano Santa Brites Dias afirma, orgulhu tebes ba loron 3 Dezembru nudar loron EHD iha mundu, tanba lori Governu nia naran hodi parabens ba loron espesial ida nee.
Governu prontu nafatin apoiu ema ho difisiensia sira atu moris, situasaun ida nee sustentavel no inkluzivu, tanba loron ohin nee hatudu katak ema ho difisiensia mos idmha diretu hanesan ho ema kondisaun fiziku sira, nunee husu atu valoriza nafatin ema ho difisiensia sira iha Timor Leste.
(EST 1)
