DILI, STLTIMORLESTE.com – Komando Polisia Nasional Timor Leste (PNTL) Munisipiu Dili bandu loron finadu komunidade sira labele hemu tua, iha Semiteriu sira iha kapital Dili.
Lia hirak nee hatoo husi Segundu Komandante PNTL Munisipiu Dili, Superintendente João Pires ba jornalista sira, iha Kaikoli, Dili, Kuarta (23/10/2024).
Nia dehan, relasiona ho finadu, Komando Polisia Nasional Timor Leste Munisipiu Dili alerta ona membru atu nunee prevene ba situasaun balu neebe mak akontese iha Dili laran.
“Tinan-tinan ita foo hatene ba komunidade sira katak, labele hemu tua iha Semiteriu laran, semiteriu nee ita atu tau aí funan laos ema hemu tua,” dehan nia.
Nia dehan, se mak halo ida nee autoridade seguransa hetan sei atua no sei preosesu tuir lei neebe mak iha.
Nia akresenta, prevene mos ba situasaun finadu nian, tanba nee mak Komando Munisipiu Dili alerta patrulhamentu lao.
“Ita haree ona semiteriu sira neebe iha Dili laran, ia hein para prepara planu operasaun, hodi koloka membru sira asegura situasaun iha Dili laran,” dehan nia.
Iha fatin hanesan, Xefe Suku Kuluhun, Deus Dado Martins hatete, atu tama ba loron finadu autoridade lokal hamutuk ho Konselhu Polisia Komunitaria no Ofisial Polísia Suku sempre halo vizilansia ba komunidade.
(mar)
