DILI, STLTIMORLESTE.com – Komando Polísia Nasional Timor Leste (PNTL) liu husi Diresaun Tránzitu Seguransa Rodoviaria Nasional (DTSRN) hamutuk Diresaun Nasional Transporte Terrestre (DNTT), apela ba kondutor no motorista transporte públiku no privadu sira labele tula pasajeiru liu kapasidade transporte nian, nunee minimiza mosu asidente tráfiku neebe la espera.
Diretora DNTT Maria Antonia Vitor da Costa hatete, relasiona ho loron matebian nian neebe povu iha Timor sei selebra iha loron hirak tuir mai, PNTL hamutuk DNTT apela ba kondutor transporte públiku sira hanesan bis, mikrolet no angguna neebe sempre tula pasageiru liu kapasidade kareta nian, labele tula liu kapasidade transporte nia.
“Dala barak ita sempre hasoru pasageru balun tur iha kapon leten, balun tabele odamatan sorin-sorin no aat liu tan maka balun tabele iha kotuk, ida nee perigu tebes ba ita nia vida no la seguru durante ita halao viagen,” katak nia liu husi konferensia imprensa iha salaun DNTT Balide, Kuarta (29/10/2025).
Nia informa, ho rajaun sira nee hakarak atu evita asidente tráfiku maka DNTT hamutuk ho Polisia Tránzitu Nasional no munisipiu liu husi oportunidade ida nee fo hanoin no hatoo ba motorista sira hotu katak tuir alinea 3 no 4 artigu 54 kódigu estrada bandu tula pasageiru liu kapasidade kareta nian no labele ona tula pasageiru wainhira laiha ona fatin. No apela atu hotu-hotu kumpri regras tránzitu nian, nunee hotu-hotu bele too ho seguru iha fatin neebe termina ba.
Iha fatin hanesan Xefe Departamentu Kordenasaun Jestaun Risku no Formasaun Edukasaun Sivika (DTSRN), Superintendente Assistente Polísia Domingos Gama deklara, kada tinan PNTL liu husi DTSRN servisu hamutuk ho DNTT sempre fo avizu no apela ba motorista sira wainhira too ona loron Finadu nian tanba ema barak maka halo viagem husi Kapital ba munisipiu no sempre mosu asidente.
“Iha oportunidade ida nee avizu ba kondutor no pasageiru sira, seguransa ba vida nee iha idak-idak nia liman, tanba nee husu atu kumpri regras no lalaok tranzitu nian wainhira halao viagen ho distansia neebe maka dok atu bele too iha fatin ho seguru,” nia deklara.
Nia mos husu ba Komandu PNTL Munisipiu 13 inklui RAEOA liu-liu Seksaun Tránzitu atu apoiu seguransa ba aktividade pasa revista ba transporte sira neebe maka tula pasageiru liu kapasidade transporte nian.
Jornalista: Jeniche da Costa
Editora: Domingas Gomes
