DILI, STLTIMORLESTE.com – Loron ida Diresaun Jeral Servisu Rejistu Notariadu (DJSRN) produs pasaporte atus rua (200) too atus tolu (300), tanba makina imprime pasaporte foun rua funsiona fali.
“Agora ema menus ona, agora se mak la rejistu online mos bele mai fo hatene, autoriza ba hasai foto, makina rua neebe iha loron ida bele produs 300 ka 200 resin tuir, lo-loos nee makina rua bele produs too 500,” dehan Diretor Jeral Servisu Rejistu Notariadu, Agustinho Gonsalves Viera ba jornalista sira, iha Mandarin, Dili, Segunda (04/11/2024).
Nia hatutan, atu kuidadu makina nee hodi dura ho kleur, tenke uza ho kuidadu, se hakarak obriga la kleur bele avaria, tanba nee tenke uza ho didiak.
Nia dehan, pasaporte sira neebe tarata iha munisipiu bele foto iha neeba, maibe makina labele imprime, tanba makina nee sensetivu no la hanesan makina baibain no tau sala la funsiona, makina neebe mai nia nain kontrola kuandu muda oituan nia nain neebe fabrika hatene ona, tanba nee pasaporte sira tenke lori mai imprime iha Dili.
No razaun ida mak rekursu umanu menus, ema neebe atu kaer kona-ba makina nee tenke iha konhesimentu atu uza, labele kaer arbiru sasan neebe ho folin karun, tenke kaer ho kuidadu atu dura ho kleur.
Tanba foin lalais iha Domingu kotuk liu ba, ahi mate afeta ba sistema monu, maibe iha loron Segunda no Tersa lao normal fali.
Maibe oras nee daudaun iha zerador ida, no rekomenda ona ba iha tekniku sira atu monta automatika kuandu ahi mate zerador bele moris rasik, no ahi mate zerador bele mate automatik.
Iha fatin ketak, Akademiku UNTL, Sebastiao dos Santos dehan, tenke iha planu neebe diak, atu ema neebe tarata passaporte, labele dunu hanesan uluk.
“Hau hanoin tenke kria planu liu husi sistema ida neebe diak, atu nunee ita nia komunidade sira neebe atu ba tarata passaporte, labele mosu prekupasaun balu hanesan iha fulan balu liu ba,” dehan nia.
(ter)
