DILI, STLTIMORLESTE.com – Hanesan ema sarani tauk oituan hanoin kona-ba loron finadu, maibe liu husi leitura sira neebe iha fo forsa ba ita, no loron ikus iha ita nia vida moris mak hasoru malu ho Maromak.
Liu husi omilia Kardeal Dom Virgilio do Carmo da Silva dehan, “ita tauk oituan atu hanoin kona-ba loron ida nee, sentimentu hanesan ita ema nian tauk preokupa, maibe leitura neebe iha sai xavi ida ba ita idak-idak hodi fo forsa ba ita, oinsa buka moris diak liu tan iha rai ida nee, hodi loron ikus hasoru malu ho Maromak,” dehan Kardeal iha nia omilia, iha Igreja Balide, Sabadu (02/10/2024).
Iha leitura dala uluk liu husi Livru Job preokupa kona-ba loron ikus no hanoin kona-ba loron ikus, hakarak hakerek husik hela buat ruma ida rai nee, kona-ba loron ikus atu hasoru malu ho Maromak.
Amu dehan, iha São Paulo nia surat koalia kona-ba resourisaun, los duni iha loron ikus buat hotu sei hotu, maibe ba sira neebe fiar iha Kristu sei hetan moris.
Nunee iha Evanjelhu São Markus nian, konsola sarani atu agradese ba iha Maromak, tanba bele iha fiar, no haree ba mate laos ho matan tomak ema nian deit, maibe tanba fiar ida nee mak bele buka Maromak hodi agradese, tanba moris neebe nia fo ba ema bele rekonhese katak, iha mate nia kotuk sei iha moris.
Kardeal fo hanoin katak, mate sentidu neebe diferente, maibe sarani mate sentidu ida uniku, tanba mate nuudar transformasaun, moris foun isin fila fali ba rai, maibe klamar fila fali ba Maromak, moris iha Nai Maromak nia reinu.
São Paulo dehan, hakarak tebes atu husik ona mundu nee, no ba hamutuk ho Kristu ida neebe diak liu hotu nia Nain, no mate mai husi ema ida, nunee mos moris hias mai husi ema ida, husi Adaun mate tanba sala, maibe iha Kristu lori ema hotu no hasai ema isin atu la mate ba nafatin.
Mate laos rohan, wainhira ema mate, fatin ida prepara hela ba iha Maromak nia sorin, Kristu nia moris hias, mak hein esperansa.
Ohin loron tomak atu hanoin kona-ba matebian sira, hanoin kona-ba sira hotu nebee husik ona mundu nee no ba iha mundu seluk atu sira bele hola parte iha Komunhaun ho Maromak ba nafatin.
(mar/ter)
