AMBENO, STLTIMORLESTE.com – Loron Sinzas bolu sarani sira atu prepara aan tama ba festa paskua hodi hanoin katak, mai husi rai sei fila ba rai, no durante tempu kuarezma loron 40 uma kreda bandu sarani sira atu halo festa kazamentu no festa selu-seluk tan.
Misa ba loron sinzas iha Igreja Tuan Santo Antonio Oekusi, Kuarta (05/03/2025) prezide husi Amu Vigariu Parokia Nossa Senhora do Rosario Oekusi, Pe. Florindo de Jesus, iha ninia omilia dehan, Kuarta Feira Sinza, nuudar sarani katolika, loron 40 selebra loron festa paskua.
“Ita hahu loron Kuarta feira sinzas nee, hodi simu ahu kdesan neebe kose iha ita idak-idak ninia rentos ho marka sinal kruz, nunee atu dehan mai ita katak, ita hahu halo arrependimentu ba sala, sinal hakribi sala nian,” dehan Amu Vigariu Parokia Oekusi, Pe. Florindo de Jesus.
Nia haktuir tan katak, ahu kdesan neebe kose iha rentos, signifika moris nuudar ema iha mundu sei la dura, tanba Maromak halo ema husi rai no loron ida sei fila ba rai.
“Ita moris husi rai, han husi rai no loron ruma ita sei fila ba rai ida nee. Husi rai nee mak ita moris, tanba nee nuudar sarani, ita hotu konsiente aan katak, ita nee mai husi rai, nee duni ohin ita mai simu rai ida nee. Uma kreda kuandu iha tempu kuarezma durante loron 40, ita prepara ita nia aan atu selebra festa paskua, hahu kedan husi loron kuarta feira sinzas ohin,” afirma Pe. Florindo liu husi ninia omilia.
Igreja husu ba sarani sira atu halo jejun no halo aptinensia durante tempu kuarezma neebe mak halo sarani sira bele simu penitensia ba salan sira. Saun Paulo iha ninia surat dehan, kuarezma nuudar tempu diak ida, tempu osan mean ida, tempu ba sarani sira atu prepara aan hodi selebra festa paskua.
“Durante tempu kuarezma, ita nuudar sarani katolika presiza hamate aan husi ita nia kaan sira, han hemu natoon, halo jejun barak, halo orasaun barak no halo karidade barak,” haktuir amo.
Sinal ahu kdesan iha rentos signifika halo sarani sira lao tuir dalan loos, dalan neebe Jesus hanorin ba sarani sira hodi hakribi salan ho lo-loos no husu Maromak ninia perdaun ba salan sira, simu ahu kdesan hanesan simu kruz husi tos oliveira ba foho kalvariu hodi hadera-an, jejun hamutuk ho Jesus iha rai fuik maran.
(jos)
