DILI, STLTIMORLESTE.com – Eis Prezidente Republika atual Prezidente Partidu FRETILIN, Francisco Guterres Lu Olo ho Sekretariu Jeral Partidu FRETILIN, Mari Alkatiri presta omenajen ba Saudozu Koronel Antonio Soares da Silva “Maukalu”.
Iha loron kinta lokraik (17/10/2024) Lider Nasional nain rua (2), Francisco Guterres Lu Olo ho Mari Alkatiri hamutuk familia presta omenajen ba Saudozu Koronel Maukalu neebe mak Nai bolu hikas ona iha Nai nia kadunan Santu, iha matebian nia rezidensia Kintal Boot, Dili.
Lider nain 2 presta omenajen ba Saudozu Koronel Maukalu bainhira remata simu mate isin saudozu neebe halo transladasaun husi Malazia mai iha Timor Leste.
Saudozu Maukalu hakotu nia peregrinasaun iha mundu hodi fila hikas ba Nai nia kadunan Santu, deskansa rohan laek iha loron 12 Outubru 2024, iha Malazia, bainhira halao tratamentu mediku iha hospital Malazia.
Saudozu Antonio Soares da Silva “Maukalu”, moris iha loron 9 Dezembru 1962, iha Makadiki Uatolari, Munisipiu Vikeke. Molok invasaun, Maukalu tama FALINTIL nuudar soldadu iha sentru instrusaun Taibesi Dili. Hafoin invazaun Maukalu kontinua sai militar ho kargu soldadu pertensia ba kompanhia movel ho Komando Paulino da Gama Mauk Moruk iha Setor Ponta Leste.
Iha 1976 Maukalu asumi kargu Komandante Pelutaun movel neebe ikus mai transforma ba forsa intervensaun.
Iha tinan 1977-1978, Maukalo noemadu Komandante pelutaun primeira kompanhia de Choque. Hafoin zona libertadas rahun, husi tinan 1979-1980 Maukalu kontinua Komandante pelutaun forsa konsentrada. Depois konferensia reorganizasaun nasional iha tinan 1981, Maukalu ezerse kargu Komandante pelutaun da kuatru kompanhia husi Brigada Vermelha kolokadu iha Rejiaun Nakroma. Husi tinan 1984-1991 Maukalu asumi kargu Segundu Komandante ba III Unidade ba forsa konsentrada.
Batalhaun 303 husi forsa invanzasaun Indonezia kaptura Maukalu iha loron 20 Junhu 1991 no sai prizoneiru iha Soibada, Ainaro 1996. Iha prizaun Maukalu involve iha atividade organizasaun frente Klandestina to’o 1999, ikus mai reingresu ba forsa Armada FALINTIL. Iha periode Independensia Maukalu asumi kargu nuudar Xefe Repartisaun Justisa F-FDTL.
Iha tinan 2017- 2022 Maukalu nomeado no asumi kargu nuudar Xefe Kzsa Militar Prezidensia Repúblika ho postu Coronel F-FDTL.
(eme)
