DILI, STLTIMORLESTE.com – Prezidente Partidu FRETILIN, Francisco Guterres “Lu-Olo” hateten, IX Governu Konstitusional partidariza sistema administrasaun publika, tanba rekruta deit militante partidu nian hodi taka dalan ba Timoroan sira seluk neebe oras nee buka hela servisu.
“Sim, hau la iha duvidas no ate ema simples no ema kiik sira mos la iha duvidas ona, wainhira hatene Governu ida nee katak realmente sira halo partidarizasaun, sira halo buat hotu-hotu sai tiha hanesan partidu ninian mak iha neeba, laos hanesan Governu ida neebe reprezenta povu,” hatete Prezidente Partidu FRETILIN, Lu-Olo ba jornalista sira iha CCF Komoro, Dili, Sabadu (05/04/2025).
Prezidente Partidu FRETILIN hatutan, partidu sira neebe oras nee kaer Governu lo-loos loke oportunidade ba Timoroan sira atu asesu ba servisu, laos halo fali karta rekomendasaun ida hodi rekruta militante partidu nian.
Tuir nia, partidu neebe kaer ukun tenke reprezenta povu tomak iha nasaun nee, tanba nee kuandu orgaun partidu nian ou instituisaun estadu ka governu atu foti desizaun karik tenki loke oportunidade ba Timoroan sira atu hetan servisu, laos halo rekomendasaun atu rekruta militante partidu nian.
“Sira iha leten nee partidariza duni, tanba iha kraik nee rekomenda ninia estrutura baze partidu nian hodi hola desizaun no afavor ba sira nia propriu partidu, hanesan nee oinsa Governu bele reprezenta povu iha nasaun nee,” realsa nia.
Tanba nee, Prezidente Partidu FRETILIN nee husu atu halo investigasaun ba prosesu rekrutamentu neebe IX Governu Konstitusional halo.
“Klaru, nee devia tenke ser loke investigasaun ba ida nee, senhor Primeiru Ministru ida neebe hanesan responsavel prinsipál masimu ba iha governu devia haree buat sira nee,” hakotu nia.
(alb)
