DILI, STLTIMORLESTE.com – Eis Prezidente Republika atual Prezidente Partidu FRETILIN, Francisco Guterres Lú Olo husu kuadrus no militantes sira atu hakaas nafatin ba atividade partidu nian, nunee bele liberta povu husi kiak no mukit.
Lú Olo hatoo lia hirak nee liu husi mensajen neebe STL asesu husi Media Eis Prezidente Republika, Segunda (02/12/2024).
“Ba kuadrus no militantes FRETILIN, hau apela katak oras nee dadaun ita tenke hakas aan nafatin halao atividade ita nia partidu nian no haklean liu tan ita nia kompromisu atu liberta ita nia povu husik kiak no mukit neebe hanehan nia moris loron ba loron,” dehan Eis Prezidente Republika nee.
Povu tuir Prezidente Partidu FRETILIN nee katak, presiza FRETILIN nia vizaun hodi tahan povu husi konsekuensia politika, tanba nee husu militante sira nafatin esforsu aan hodi kore povu husi kiak no mukit.
Tanba FRETILIN harii nia obra polítika boot ida hanesan ho nia istoria neebe nakonu ho nia eroizmu, husik hela nia murak sira sai eroi no martires ba ukun rasik aan. Sira mak fo ezemplu korajen no sakrifisiu, sira nia memoria sei moris nafatin ho liberdade.
No iha loron 28 Novembru 2024 komemora ho orgulhu independensia ba dala-49, nuudar loron istoriku neebe reprezenta FRETILIN nia luta, nia forsa, nia korajen, nomos nia sakrifisiu selebra duni povu ida nia liberdade neebe povu nee rasik mak konkista liu husi luta naruk neebe nia halo ho determinasaun no korajen tomak hamutuk ho FRETILIN no FALINTIL.
Maibe iha loron istoriku ida nee mos konvida hotu-hotu atu renova kompromisu politiku atu liberta povu harii futuru Timor Leste ida justu, prosperu, no demokratiku ba Timoroan hotu-hotu.
Tanba independensia ida nee laos deit sinal husi pasadu istoriku, maibe mos nuudar hotu-hotu nia hakat boot ida tan atu hasoru dezafiu, atu manan dezafiu no manan futuru justu, dignu no demokratiku ho liberdade no pas.
(eme)
