DILI, STLTIMORLESTE.com – Eis Prezidente Republika atual Prezidente Partidu FRETILIN ho Sekretariu Jeral Partidu, Mari Alkatiri hatete, Timor Leste (TL) tenke kontinua Amu Papa Francisco nia luta ba igualidade.
Tuir komunikadu Neebe STL asesu husi media FRETILIN Tersa kalan (22/04/2025) hatete, Timor Leste tenke kontinua Amu Papa Francisco nia luta ba igualidade.
Ho tristeza boot mak FRETILIN simu notisia husi Vatikanu kona-ba Sua Santidade Papa Francisco nia mate.
Notisia ida nee kontra FRETILIN no povu Timor Leste nia espetativa, tanba Amu Papa Francisco nia aparisaun publika, iha loron Sabadu Santu no Domingu Paskua hametin ema nia fiar, katak maske neineik, maibe Amu Papa Francisco sei hahu asumi fila fali ninia knaar nuudar Líder Igreja Katolika nian no mos kontinua fanu mundu tomak atu labele haluha ema kiik no kiak sira.
“FRETILIN sente Amu Papa Francisco nia mate reprezenta lakon boot ida ba Timor Leste no umanidade tomak”, dehan Sekretáriu Jerál FRETILIN, Marí Alkatiri.
Mari dehan, tinan kotuk durante nia vizita mai Timor Leste, Amu Papa husu atu líder sira nasaun nian fo prioridade ba povu tomak nia moris diak no laos ba grupu kiik ida deit nia diak, labele hases no hanehan Timoroan sira neebe kiak no kiik, atu hamosu duni justisa sosial iha rai ida nee.
Durante vizita iha Timor Leste, Amu Papa Francisco husu povu Timor Leste no líder sira promove moris diak ba ema hotu, justisa sosial, unidade, pas no rekonsiliasaun, no tau matan ba meiu ambiente atu jerasaun sira tuir mai mos bele goja.
Nunee mos Prezidente Partidu FRETILIN, Francisco Guterres Lu Olo hatete, Amu Papa Francisco nia vizita mai Timor Leste laos deit hametin liu tan sarani Katolika Timor Leste nia fiar, maibe mos fo hanoin atu Timor Leste sai duni fatin iha neebe ema hotu-hotu bele sente ukun rasik aan, moris ho dignidade no hirak neebe povu hili atu kaer ukun servisu duni ba hasai povu husi kiak, beik no mukit tuir valor sira neebe FRETILIN hatuur iha 1974.
“Amu Papa husik ita tomak iha kedas momentu ida neebe mundu hasoru dezafiu boot ba garante ema tomak nia moris diak. Maibe hau fiar katak Amu Papa Francisco nia partida sei unifika no haforsa liu tán povu Timor Leste tomak, atu kontinua ninia luta sira neebe halo Timor Leste sai buras liu no mundu ida neebe diak liu”, Lú Olo konklui.
Iha tinan 2020, atual Prezidente FRETILIN neebe momentu neeba halao knaar nuudar Prezidente Republika konvida Amu Papa Francisco mai vizita Timor Leste, neebe hetan resposta pozitivu. Maibe tanba pandemia Covid-19, Amu Papa nia vizita adia mai tinan 2024, no ida nee nuudar primeiru vizita husi Papa ida hafoin Timor Leste restaura nia independensia.
Papa Francisco nia vizita akontese iha loron 9 too loron 11 fulan Setembru tinan 2024, konside ho selebrasaun tinan 50 ezistensia FRETILIN nian.
(eme)
