DILI, STLTIMORLESTE.com – Tempu difisil feto sira mos kontribui makaas ba luta ukun rasik aan, no ohin loron hetan liberdade feto nia papel importante hodi partisipa iha dezenvolvimentu nasional.
Kestaun nee hatoo husi Feto Potensial Merlinda Soares Pinto De Aquino ba jornalista STL iha nia knaar fatin Plaza, Segunda (02/06/2025).
Nia hatete, feto sira iha Timor Leste no iha Mundu International, jeralmente hetan papel importante iha luta independennsia, direitu igualdidade no dezenvolvimentu komunidade no nasaun.
“Feto sira hatudu barani hodi inklina aan partisipa feto iha lideransa katak feto sira neebe sai lider iha movimentu sosial no politiku. Konsistensia katak feto sira iha tempu neebe susar maibe sira nafatin fo kontribuisaun ba dezenvolvimentu rezilennsia katak feto sira la sente kolen, maske enfrenta dezafiu barak,” katak nia.
Nia hatete, husi feto nia kontribuisaun sira nee husik hela valor ba foinsae sira lao tuir hodi partisipa iha konstrusaun estadu.
“Esperiensia neebe husik hela mai ita mak hanesan valor solidariedade katak feto sira aprende atu servisu hamutuk hodi apoiu malu. Importansia edukasaun katak edukasaun papel ida hodi bele kontinua luta ba mudansa ba dezenvolvimentu ba povu no nasaun,” katak nia.
Nia mos hatoo mensajen ba jerasaun foun sira katak, jerasaun foun sira bele aprende husi luta feto sira nian hanesan labarik sira tenke respeita no apresia istoria luta feto sira nian.
“Hakrak halo mudansa tenke hetan inspirasuan husi istoria feto maluk sira neebe husik hela mai ita hodi kontribui ba dezenvolvimentu nasaun. Labele tauk, tenke barani fo ideia kritiku neebe konstrutivu hodi halo mudansa ba dezenvolvimentu nasional liu husi partisipasuan ba feto iha area oin-oin,” dehan nia.
Nunee mos Lídia Assunção das Neves koordenadora ba Servisu Komunikasaun Sosial husi Prezidensial Republika hatete, nasaun ba oin presiza mos feto, tanba nee husu feto nafatin esforsu aan hodi duni tuir mehi neebee mak iha.
“Feto nafatin fiar iha poder, feto iha poder, iha feto liman husu luta ba determinasaun hatoo mensajen ba feto sira atu esforsu aan luta ba oin,” katak nia.
Nia hatutan, feto mos iha direitu hanesan mane, tanba nee mak husu feto sira kontinua esforsu aan hodi lao ba oin.
“Fiar iha poder neebe iha, iha imi nia liman. Luta ho determinasaun ba imi nia direitu sira no ba espasu ka fatin neebe imi merese iha sosiedade. Kada esforsu konta no kada pasu neebe imi fo sei haforte liu tan, laos imi deit, maibe komunidade hotu hamutuk, ita bele inspira iha mudansa signifikativa no konstrui futuru ida neebe hanesan ba ema hotu. Labele desiste mundu presiza imi nia forsa no imi.nia lian. Ba oin nafatin iha imi nia luta no buka tuir nafatin imi nia mehi sira,” katak nia.
Nia hatutan, feto sira atu bele sai ativu liu tan liu husi asaun sira hanesan buka formasaun no aumenta konhesimentu, partisipa iha kursu no formasaun sira neebe dezenvolve abilidade profisional no pesoal partisipa iha grupu no organizasaun sira neebe promove direitu feto nian no iha igualdade ba jeneru.
(eme)
