DILI, STLTIMORLESTE.com – Organsaun Noun Governamental (ONG) Luta Hamutuk (LH) apresia proposta lei reforma obrigatoriu ba Funsionariu Publiku, nunee bele fo oportunidade ba jerasaun enerjetiku sira atu servisu.
“Ita konkorda atu orgaun estadu liu-liu Prezidente Republika (PR) presiza implementa ba dekretu lei kona-ba Funsionariu Publiku, mai tenke kria kondisaun ba sira, tanba sira neebe konsidera idade reformadu, nia kontribuisaun kuaze tinan 30 too 40 ba leten, presiza fo kondisuan dignu,” dehan Diretor Ezekutivu Luta Hamutuk (LH), José Alves da Costa ba STL iha Farol Dili, Segunda-feira (28/10/2024).
Tanba tuir nia haree husi proposta lei obrigatoriu ba Funsionariu Publiku nee iha benefisiu ba sosiedade, tanba lei nee atu fo fali oportunidade ba jerasaun foun sira hodi kontinua halo servisu hodi dezenvolve fali nasaun Timor Leste.
Maibe nia mos husu atu implementa duni proposta lei refere iha TL, nunee bele harii kondisaun dignu ba ajente ho idade 60 ba leten atu deskansa, hodi goja sira nia vida moris, nunee jerasaun foun sira bele kondtinua fali servisu hodi apoiu no kontribui no dezenvolve ba estadu ida nee ho diak.
“Ita hanoin ba proposta lei nee importante, presiza implementa, nunee bele fo fali oportunidade ba jerasaun foun sira, liu-liu sira neebe durante nee sei buka hela servisu, tanba kuandu ho idade reformadu sira nee mak servisu nafatin, entaun oportunidade neebe bele fahe ba malu laiha ona,” dehan nia.
Entretantu Akademika husi Universidade DILI (UNDIL) area Direitu, Atanacio Monteiro dehan, proposta lei obrigatoriu ba Funsionariu Publiku sira nee atu implementa funsionalidade lei reforma obrigatoriu ba Funsionariu Publiku, nunee bele fo fali oportunidade no servisu ba jerasaun enerjetiku sira bele servisu fali.
Tanba haree konteudu dekretu lei refere atu fo valor ba ema ho idade reformadu sira, nunee bele fo fali fatin servisu ba ema, liu-liu Timoroan sira atu servisu.
“proposta lei neebe governu halo ona ba PN atu haree konteudu husi lei, atu fo reforma ba ajente neebe ho idade 60 ba leten, governu mos presiza kria kondisaun dignu ba sira bainhira sira sai husi nia knaar fatin, nunee sira bele goja fali sira nia direitu ba moris.” nia realsa.
(EST 1)
