DILI, STLTIMORLESTE.com – Ministru Asuntu Kombatentes Libertasaun Nasional (MACLN) Gil da Costa Monteiro atualiza preparasaun Loron Veteranus ba dala 9, ba Prezidente Republika (PR) Jose Ramos Horta.
Prezidente Republika Jose Ramos-Horta halao audiensia ho Ministru Gil da Costa Monteiro no reprezentante sira hosi Konsellu Kombatentes Libertasaun Nasional (CCLN). Enkontru nee foka ba preparasaun final ba Loron Nasional Veteranus iha loron 3 Marsu.
Komemorasaun tinan nee iha signifikadu istoriku neebe boot, marka tinan 45 hosi akontesimentu xave iha 1981 no mos tinan da-9 loron nee selebra ofisialmente hosi Estadu.
Bainhira remata hasoru malu, Ministru Gil da Costa Monteiro ba jornalista iha Palasiu Prezidensial Nicolau Lobato, Bairru Pite, Dili, Segunda lokraik (16/02/2026) hatete, mai konfirma no hatene hela ajenda Prezidente Republika Jose Ramos Horta nian, maibe loron 3 Marsu nee Xefe Estadu sei laiha ajenda ruma neebe marka.
Ministru informa, ohin asuntu espesifiku ba preparasaun ba seremonia 3 Marsu nian loron nasional veteranu Timor-Leste neebe tinan 2026, ho espasu tempu husi 1981 mai too ohin halo tinan 45 komemora ba dala 9, sei iha seremonia sira. fo hela informasaun verbal tanba Prezidente Republika rasik hakarak hatene.
Alende, informa mos kona-ba kondisaun fatin neebe atu halo seremonia nee hanesan neebe, tanba iha hela prosesu preparasaun, entaun informa daudauk ona situasaun balun. Nunee, aban bainrua mai oin nee protokollu husi Prezidensia Republika sei partisipa mos enkontru sira hotu-hotu, no ekipa sira sei partisipa ofisialmente loloos nee konvite sira seluk nee depois fila fali mai, mais verbalmente tenke hatoo lai.
“Tanba relasiona ho Prezidente Republika ninia ajenda sira dala ruma ajenda monu karik nia auzensia, nia ba nesesidade ruma iha nasaun seluk pur ezemplu neebe ohin ami mai konfirma, no hatene hela. Prezidente Republika hatete, iha loron 3 Marsu nia sei laiha ajenda ruma iha loron neebe marka,” informa Ministru Gil Oan Soru.
Ministru hatete tema mak unidade na deversidade ho ninia sentidu patriotizmu, ida nee atu dehan bele namkari diferente kultura, polítika buat sira nee hotu, maibe sentidu estadu ba nasaun nee ida deit.
Nia reforsa, komemora hotu iha munisípiu sira, maibe nasional komemora iha Komoro-Madohi iha resintu CCLN.
Enkontru nee entre Ministru Asuntu Kombatente Libertasaun Nasional, Gil da Costa Monteiro Oan Soru hamutuk ho Primeiru Vise Administrasaun CCLN, Aluk, Segundu Vise Prezidente, Marito Reis, reprezentante husi rejiaun autonomu Dili, Midar, ho protokollu CCLN nian audensia ho Prezidente Republika Jose Ramos Horta.
Ministru Gil Monteiro mos fo informasaun kona-ba progresu susesu pagamentu pensaun veteranu nian, hodi hatoo katak prosesu nee besik remata ona. Ho veteranu hamutuk nain 15.000 resin neebe simu ona pagamentu no kazu nain 108 deit mak sei falta, Ministeriu foka hela ba finalizasaun 1% ikus hosi siklu pagamentu atual.
Durante enkontru, Prezidente kumpromete an atu onra eroi nasional sira no konfirma ninia prezensa iha serimonia nasional neebe sei halao iha resintu CCLN nian, iha Komoro. Ho tema “Unidade iha Diversidade,” selebrasaun nee ho objetivu atu hametin sentimentu patriotizmu no identidade nasional. Ekipa protokolu Prezidente nian sei servisu hamutuk ho Ministeriu iha loron sira tuir mai atu foka ba aranjamentu lojistiku, hodi garante katak eventu nee refleta duni dignidade veteranu Timor-Leste nian.
(eme)
