DILI, STLTIMORLESTE.com – Madre sira husi Kongregasaun Alma uza fatin neebe Sua Santidade Papa Francisco vizita, hodi hasoru malu ho labarik sira sai fatin sagradu hodi halo orasaun.
Madre Superiora husi Kongregasaun ALMA, Madre Florensia Nebo Hokeng hatete, ohin halo tinan ida Sua Santidade Papa Francisco vizita Timor Leste nomos vizita Madre no Labarik sira iha Kongregasaun Alma, no bainhira Sua Santidade fila hikas ba Vatikano Roma, fatin ida nee uza hodi halo orasaun no sai fatin sagrada.
“Bainhira Sua Santidade fila ba Vatikano, fatin nee uza hodi halo orasaun. Ami madre sira hamutuk ho labarik sira lokraik dader, ami halo orasaun iha fatin ida nee no kada Sesta halo orasaun Jesus Mizerikordia, ou doa Kerahiman hamutuk ho labarik sira iha fatin nee,” dehan Madre Superiora Alma ba STL iha nia knaar fatin Pantai Kelapa, Kuarta (10/09/2025).
Madre nee dehan, antes fatin nee hodi halo enkontru no atividade seluk, maibe ho vizita Sua Santidade mai vizita, madre sira utiliza fatin nee sai fatin uma orasaun.
“Fatin nee ami hanaran Orasaun Papa Francisco, tanba nee fatin nee sai fatin sagrada, fatin istoriko nakloke ba se deit mak hakarak mai halo orasaun iha fatin ida nee, no ema barak mos mai halo orasaun iha fatin ida nee,” katak nia.
Iha fatin hanesan Madre Asti Soares husi Kongregasaun Alma hatete, fatin neebe uluk Sua Santidade Papa Francisco tuur hodi hasoru malu ho labarik sira, depois de remata vizita madre sira uza fatin nee sai fatin sagrada hodi halo orasaun.
Madre Asti dehan, salaun nee antes seidauk hetan vizita, uza ba kualker atividade nomos uza han fatin ba labarik sira dader meudia no kalan hamutuk ho madre sira iha salaun nee, maibe bainhira rona novidade katak Amo Papa Vizita labarik defisiensia sira iha Alma, entaun madre sira deside salaun nee sai sentru ba vizita Sua Santidade Papa atu hasoru direita ho labarik sira ho nesesidade espesial.
“Amu Papa nia tuur fatin nee depois de Amo Papa vizita fatin nee ami la uza ona ba atividade kualker atividade saida deit, maibe ami sempre uza fatin nee hanesan fatin esperitual nia, ezemplu halo retiru ruma, rekoleksi ruma nomos iha fatin nee rasik ami madre ho labarik sira dader no lokraik sempre halo orasaun tersu hamutuk ho labarik sira iha fatin ida nee,“ dehan nia.
Madre hatutan, la senti vizita Papa mai Timor Leste ohin halo tinan 1, no esperansa husi madre Alma nomos labarik defisiensia nomos esperansa husi povu no sarani Timor oan mak grasa Maromak nia horik ho ema idak idak.
Iha biban nee Madre husu ba sarani sira, atu nafatin reza ba Sua Santidade Papa Francisco nia klamar moris hakmatek no haksolok, hamutuk ho santo no santa sira, no Papa mos lahaluha sarani sira nafatin sai reza nain ba nia povu liu liu sarani Timor Leste.
Jornalista: Emerenciana Pinto / Mikael M. Mau
Editora: Domingas Gomes
