DILI, STLTIMORLESTE.com – Madre Maria Amaral, SSpS husu familia idak-idak presiza fiel ba malu iha terus, triste no haksolok tuir juramentu neebe halo ona iha altar lulik.
Madre Maria Imaculada de Aroujo Lopez Amaral, SSpS hatoo lia hirak nee ba jornalista STL, bainhira remata partisipa misa Domingu Ramos, iha Kapela Sentru Formasaun Polisia, Komoro, Domingu (13/04/2025).
Madre esplika, ohin loron iha familia balun neebe moris hamutuk no halo ona juramentu iha altar lulik maibe ikus hili dalan divorsiu la fiel ba juramentu neebe mak sira halo iha altar lulik, katak sei hadomi malu, respeita malu iha tempu diak no aat nia laran, ho nunee iha semana santa nee familia idak-idak presiza halo refleksaun ba aan, nunee moris tuir dalan neebe promete ona ba malu iha altar lulik.
“Ita haree familia sira ohin loron familia barak mak soe malu, tanba ema la fiel ba sira nia sakramentu sakramentu no promete neebe sira idak idak promete ona ba malu, entaun hanoin tempu ida nee tempu forte ida nee familia sira koko reflete idak idak nia aan atu nunee bele Fiel ba imi nia komitmentu neebe imi hatoo ona ba malu, komitmentu nee laos feen ho laen halo bainhira iha situasaun diak, maibe iha situasaun sira neebe triste hasoru dezafiu feen ho laen sira hamutuk ba malu nafatin, nunee imi bele hola parte hamutuk ho Kristu neebe terus tanba ita, atu nunee iha terus nia laran nee ita mos moris hamutuk ho Kristu iha Domingu resurisaun,” katak Madre.
Madre hatutan, feen naatin respeitu laen no laen mos respeita feen. Nafatin hadomi malu iha tempu diak no aat nia laran, labele hadomi malu iha tempu diak no tempu aat soe malu.
Madre hatutan, moris iha mundu la ses husi problema no dezafiu oin-oin, maibe nuudar ema fiar nain nafatin fiel ba malu hodi hasoru hamutuk dezafiu neebe hasoru iha oin.
(eme)
