BAUKAU, STLTIMORLESTE.com – Governu liu husi Ministeriu Administrasaun Estatal (MAE) fo ona pose ba Administrador Postu Kelikai Antigu no Postu Matebian.
Serimonia pose refere prezide husi Ministru Administrasaun Estatal, Tomas do Rasario Cabral ofisialmente simu husi Domingos Pereira neebe lidera Postu Matebian no Francisco Matias Gusmão lidera Postu Kelikai Antigu neebe hetan nomeiasaun direita husi Governu tuir dekretu lei nu.34 ho diploma Ministerial neebe regula funsionamentu tutela ba Autoridade Munisipal.
“Ohin pose ba Autoridade Postu Administrativu nain 2 neebe bele kompleta ona estrutura Munisipal nian, tanba komunidade husi Postu 2 nee dook liu entaun ita kria Postu foun hodi lori governasaun besik liu ba povu,” hatete Ministru Tomas do Rasario Cabral ba iha Vila Antiga, hafoin remata serimonia pose no entrega motorizada ba Suku 59 iha Vila Antiga, Kinta (12/12/2024).
Munisipiu Baukau rasik antes nee iha Postu 6, hanesan Baukau vila, Vemasi, Venilale, Laga, Baguia inklui Kelikai neebe rejistu ho Suku 15, maibe Postu Kelikai rasik fahe ona ba Postu 3, neebe kada Postu rejistu Suku 5, nunee prosesu atendimentu Autoridade Postu nian besik liu ba povu iha prosesu dezenvolvimentu, tanba antes nee liu-liu iha Postu Kelikai rejistu Suku 15 iha difikuldade barak neebe Autoridade Postu la kobre.
Maibe iha mudansa estrutura, Autoridade Postu nuudar reprezentante Governu sentral neebe estrutura kiik liu iha baze atu asegura programa Governu hodi fo benefisiu ba komunidade, laos oportunidade atu buka Governu nia sala, maibe tenke servisu hamutuk entidades hotu ho profisional no responsabilidade hodi asegura interese publiku, tanba oportunidade ba ukun aan sosa ho raan no ruin.
“Hau husu atu kria pas no estabilidade iha rai ida nee no asegura situasaun neebe Administrasaun halo hela, Autoridade Munisipal iha obrigasaun atu halo mudansa, tanba Autoridade Munisipal reprezentante Governu sentral iha Munisipiu,” tenik Tomas.
Nunee husu Administrador Postu Administrativu nain 8 tenke organiza Xefe Suku sira ho komprimisiu politika ida deit, lori povu ba moris diak, maibe bainhira servisu la profisional, Autoridade Munisipal iha obrigasaun halo mudansa, tanba Autoridade Munisipal nuudar reprezentante Governu sentral iha Munisipiu hodi implementa servisu sira.
Tanba Governu atribui servisu autonomu 8 inklui servisu 19 kompostu servisu edukasaun, agrikultura, obras publiku, saude no seluk tan Autoridade Munisipal rasik implementa ona, tanba nee presiza servisu hamutuk inklui Xefe Suku sira hodi lori povu ba moris moris diak.
Enkuantu Administrador Postu Matebian, Domingos Pereira hateten, prontu servisu ho profisional hodi responde ba nesesidade iha baze liu husi kooperasaun servisu ho entidades hotu.
“Nee hau seidauk bele hatoo, tanba foin simu pose seidauk bele iha programa, maibe depois fila mak ami halo programa,” hateten
Kona-ba planu prioridade, Autoridade Postu Matebian rasik seidauk iha planu, tanba foin simu pose, maibe planu sira sei desidi liu husi Asembleia Postu Administrativu.
Nunee mos Administrador Postu Kelikai Antigu, Fransisco Matias Gusmão hateten, kargu ba Admistrador nee laos oportunidade, maibe nee responsabilidade, tanba nee sei servisu hamutuk ho Xefe Suku sira hodi atinji mehi dezenvolvimentu neebe atur ona iha livru planu estratejiku dezenvolvimentu nasional, kore povu husi problema infraestrutura bazika.
(EST 2)
