DILI, STLTIMORLESTE.com – Ministeriu Administrasaun Estatal (MAE ) hamutuk ho Autoridade Munisipiu Dili, ofisialmente fo tomada pose ba estrutura suku foun haat husi Munisipiu Manatuto, Ermera no Lautem.
Suku foun haat kompleta ona estrutura suku mak hanesan, Francisco de Paulo Soares lidera Suku Iliheu, Postu Manatuto Vila, Luis Mendonça lidera Suku Laku Mesak, Postu Laclo, Munisipiu Manatuto, Domingos Babo Soares lidera Suku Poetete, Postu Ermera no Faustino Dias Almeida lidera Suku Baduru, Postu Lautem.
Iha ambitu serimonia tomada pose nee Ministru Administrasaun Estatal ( MAE), Tomas do Rosario Cabral hatete, lider komunitariu sira neebe mak ohin simu tomada pose fila ba idak-idak nia suku, hodi organiza servisu sira iha suku laran.
“Ba xefe suku sira neebe mak ohin simu tomada pose atu fila fali ba suku hodi organiza servisu neebe importante iha suku mak hanesan administrasaun suku nia no organiza populasaun iha suku rasik too aldeia, ida nee mak xefe suku sira nia papel importante atu organiza administrasaun no kria pas no estabilidade iha suku laran,” dehan MAE, Tomas liu husi nia diskursu bainhira fo tomada pose ba estrutura suku haat, iha Salaun VIP, Ministeriu Administrasaun Estatal, Kaikoli, Dili, Kinta (03/04/2025).
Governante nee haktuir, ba lideransa komunitariu foun sira mai ho hanoin foun no energia foun hodi bolu diretor sira iha munisipiu hodi halo servisu liu-liu ba iha infraestrutura bazika sira iha suku laran.
“Bolu diretor sira ajuda ita boot sira halo servisu liu-liu infraestrutura baziku edukasaun, saude, sira neebe mak lakohi halo presasaun ka lakohi halo servisu ona diak liu sira fila fali ba sistensia ba autoridade sira tau fali ema neebe mak iha enerjia foun hodi halo servisu, ida nee mak xefe suku nia papel,” katak MAE, Tomas.
Iha biban hanesan, Xefe Suku Laku Mesak, Luis Mendonça hateten, hanesan lideransa foun prontu hodi simu responsabilidade atu responde ba komunidade sira ninia preokupasaun iha baze, hodi halo identifikasaun ba kondisaun infraestrutura sira hanesan bee moos no eletrisidade sira iha suku laran.
“Husi tomada pose ohin nee katak ita hanesan xefe suku simu knaar ida nee atu halo atendimentu ba iha suku, prontu atu halo servisu sira mak hanesan defende povu nia direitu nunee nafatin haree ba povu kbiiit laek no ema defisiensia sira, tanba sira mak hili, hau prontu hodi servi sira no prontu hodi garante katak atu lao tuir mensajen sira neebe mak ohin ministru koalia,” dehan Luis.
Entretantu total populasaun iha Suku Laku Mesak, Postu Administrativu Laclo hamutuk 3.240 kompostu husi aldeia lima mak hanesan Aldeia Nakaleu, Aldeia Tagamu, Aldeia Readodok, Aldeia Hatukona no Aldeia Ilagou.
(EST 2)
