BAUKAU, STLTIMORLESTE.com – Ministeriu Administrasaun Estatal (MAE) hamutuk ho Autoridade Munisipiu Baukau, ofisialmente fo pose ba estrutura suku tolu iha Munisipiu Baukau ba periodu 2025 too 2032.
Ministru Administrasaun Estatal (MAE), Tomas do Rasario Cabral hateten, eleisaun suku ba suku foun sira hotu iha teritoriu nasional neebe realiza iha loron 25 Janeiru 2025 iha Munisipiu Baukau akontese iha suku foun tolu, mak hanesan Suku Builai no Kaibada Makasae iha Postu Administrativu Baukau Vila no Suku Werumata iha Postu Administrativu Laga.
“Ho autoridade postu administrativu suku tomak neebe ohin simu tomada pose dader ida nee, hau aproveita oportunidade ida nee ho prosesu neebe mak iha ita atu reorganiza fila fali governasaun, hau hanoin serimonia ida nee atu reafirma fila fali pozisaun governu nian hakarak Baucau atu ba munisipiu tenke kria pas no estabilidade,” dehan MAE, Tomas liu husi nia diskursu, bainhira fo tomada pose ba estrutura suku tolu iha Sentru Konvensaun Baucau, Tersa nee (1/04/2025).
Governante nee haktuir, suku foun tolu nee kompleta ona estrutura suku mak hanesan Xefe Suku, Xefe Aldeia, lia nain no reprezentante joven feto no mane, Juvinal Felisiano da Costa lidera Suku Builai, Julio Alegria Belo lidera Suku Kaibada Makasae no Sabino Martins lidera Suku Werumata ba mandatu tinan 7.
“Autoridade ualu postu administrativu tenke tuir ba haree, ida nee ita boot nain ualu tau planu, tanba ita boot sira mai atu servi povu ida nee, ba Xefe Suku sira mos hanesan ohin dehan kumprir e fazer hodi halo tuir pozisaun ho lei, xefe suku, xefe aldeia sira konselhu suku sira eleisaun mak hili ita boot sira, tanba iha suku iha ema nain 4 mak iha neeba, sekretariu suku nian servisu finansas no administrasaun ba asuntu sosiais,” katak governante nee.
Iha fatin hanesan, Xefe Suku Kaibada Makasae, Julio Alegria Belo hateten, mandatu tinan 7 nuudar responsabilidade atu responde preokupasaun komunidade nian iha baze halo identifikasaun ba kondisaun infraestrutura sira hanesan bee moos, eletrisidade, estrada no seluk tan hodi nesesita ba komunidade sira neebe tuir planu sei responde ho orsamentu husi Programa Nasional Dezenvolvimentu Suku.
“Depois tomada pose, ida nee saida mak xefe suku halo prontu nian asumi ba kargu ida nee atu halo atendimentu ba nia suku imparsial no neutru atu nakloke ba hau nia povu neebe mak hili hau, hau prontu servi sira saida mak hau atu halo hamutuk ho sira hodi halo dezenvolvimentu ba iha hau nia suku laran,” tenik Julio Alegria.
Lider komunitariu nee haktuir, ba iha mandatu 2025 too 2023 ba iha planu prioridade ida nee oinsa atu halo dezenvolvimentu iha suku laran mak halo kanalizasaun ba bee moos, halo atendimentu ba iha sede suku melhoramentu ba estrada no ba eskola sira neebe iha hau nia suku laran orsamentu liu husi suku mak PNDS, se karik iha posivel mak atu atinji ida nee liu husi programa ida nee mak ami atu halo ida nee.
Iha suku Kaibada Makasae total populsaun hamutuk 2.418 pesoas, feto 1.231 no mane 1.186, uma kain 586, iha aldeia haat mak hanesan Aldeia Kaiube lale, Aldeia Datawaa, Aldeia Boruba no Aldeia Maulale.
(EST 2)
