DILI, STLTIMORLESTE.com – Tempu too ona Timoroan bele sai inspetor hodi avalia fali servisu neebe iha, tanba autor Judisiariu balu iha kapasidade servisu ho tinan neebe barak.
Tuir Jurista, Alexandre Corte Real katak, atu sai Inspetor presiza iha kareira neebe aas, tanba nee sujere atu halo promosaun ba Masjistradu sira neebe servisu kleur ona, atu hasai sira nia kareira hare sira iha kapasidade diak bele nomeia hanesan Inspetor, tanba lei fo dalan.
“Inspetor haree ba kareira maibe kareira ita iha tiha ona, Juiz balu servisu uluk kedan too mai agora aselera ona sira iha progresu kareira nee, atu to iha promosaun sira bele sai Inspetor atu halo fali Inspesaun ba Juiz sira, “dehan Jurista Alexandre ba STL, iha Kaikoli, Dili, Kuarta (20/08/2025).
Nia hatutan, Timor Leste seidauk iha Inspetor tanba seidauk halo promosaun ba Juiz sira, maibe to ona tempu halo promosaun ba Juiz sira atu bele sai Inspetor.
Tanba uluk rekursu umanu sei menus, maibe ohin loron Juiz barak maka iha eperiensia diak ho kapasidade neebe iha, bele hetan promosaun hodi sai Inspetor, atu avalia fali servisu Juiz sira seluk nian.
Iha fatin ketak, Prezidente Asosiasaun Majistradus Judisial Timor Leste, Antonino Gonsalves katak, iha artigu 182 Nomeasaun, husi Estatutu Majistradus Judisiais fo dalan, atu loke konkursu ba Juiz Timor oan sai hanesan Inspetor.
“Tuir ami nia estatutu tenke loke konkursu ba Juiz Timoroan, tenke iha preparasaun hodi ba tur iha neeba, tuir lolos nee ita bele halo selesaun agora hodi servisu hamutuk ho Inspetor Internasional hodi menan pratika,” dehan Antonino.
Nia hatutan, oras nee iha deit inspetor Internasional Timoroan seidauk iha, maibe lei fo fatin atu loke konkursu, no selesiona ba ema neebe prense rekejitus, tenke domina lingua domina lei, nia valor munito bom. Liu husi selesaun se maka liu, sei ba servisu hamutuk ho Juiz Internasional hodi menan pratika, ba iha liur akompanha Inspetor sira hodi halao servisu.
Aleinde nee, Jurista Sergio Dias Quintas dehan, lei fo dalan Timoroan bele sai Inspetor.
“Lei fo dalan ba Timoroan bele sai hanesan inspetor, tanba iha estatutu Majistradu judisial define katak, wainhira sai inspetor tenki prenze rekejitu balu, ida maka tenki mai husi klase mais elevada signifika primeira klase,” dehan Jurista Sergio.
(ter)
