DILI, STLTIMORLESTE.com – Xefe Estadu Maior Jerál Forsas Armadas Nova Zelandia, Major Jenerál Rose King hamutuk ho delegasaun halo vizita ba FALINTIL-Forsa Defeza Timor Leste (F-FDTL), liu-liu ba Unidade FALINTIL iha Tasi-Tolu.
Hatete Komandante Komponente Terrestre Koronel Operasaun Espesiais Domingos da Costa Soares “DOBU” ba jornalista sira iha Unidade FALINTIL Tasi-Tolu Dili, Tersa (17/06/2025).
Nia dehan, objetivu husi vizita nee mak oinsa atu hametin diak liu tan kooperasaun entre F-FDTL ho Forsas Armadas Nova Zelandia nian, liu-liu iha area militar ao mezmu tempu atu apoiu mos Unidade FALINTIL iha área treinamentu militár no ekipamentu militár nian neebe mak Unidade nee presiza.
Iha fatin hanesan, Major Jenerál Rose King hateten, Forsas Armadas Nova Zelandia prontu atu apoiu nafatin Komando F-FDTL iha kualker apoiu saida deit liu-liu kona-ba kapasita rekursu umanu nomos ekipamentu militár nian neebe mak Komando F-FDTL presiza.
Entretantu iha vizita nee Xefe Estadu Maior Jerál Forsas Armadas Nova Zelandia, Major Jenerál Rose King ho delegasaun nee simu direta husi Komandante Komponente Terrestre Koronel Operasaun Espesiais Domingos da Costa Soares “DOBU” ho Komandante Unidade FALINTIL Tenente Koronel Abel da Costa Xavier “NIKI” iha Unidade FALINTIL Tasi-Tolu Dili.
(jen)
