DILI, STLTIMORLESTE.com – Makina CT Scan iha Hospital Nasional Guido Valadares (HNGV) avaria no la funsiona nee lalos, tanba daudaun nee makina nee funsiona hela.
Lia hirak nee Diretora Ezekutiva PCD iha HNGV, Cecilia Barros Mendonça hatoo relasiona ho deklarasaun husi Eis Primeiru Ministru (PM), Rui Maria de Araujo neebe hatete, makina CT Scan iha Ministeriu Saude (MS) avaria no la funsiona.
“Ita klarifika ba publiku aberta katak, deklarasaun dehan makina CT Scan la funsiona nee lalos, tanba daudaun nee MS sei utiliza no halo detektiva ka diagnosa ba kondisaun saude iha publiku,” dehan Cecilia ba jornalista sira, hafoin halo konferensia imprensa iha HNGV, Dili, Segunda (16/12/2024).
Makina CT Scan iha Timor Leste tuir nia, ida deit mak iha Hospital Nasional Guido Valadares (HNGV), neebe daudaun nee sei funsiona hela, doutor espesialista sira sei uza hodi halo diagnostiku ba saude, no nia problema laos avaria maibe makina refere nia tali korea mak besik atu kotu, maibe sei uza nafatin.
Kondisaun makina CT Scan nee nia tali korea besik kotu, nunee mak MS buka alternativu katak uza ba kondisaun saude husi pasiente sira neebe urjente no importante liu atu ajuda, maibe laos dehan avaria ka makina refere la runsiona.
No dadus sira nee hatudu katak durante nee makina CT Scan sei funsiona hela no la avaria, tanba nee mak deklarasaun husi Eis Primeiru Ministru nian nee lalos, no hanesan parte Governu liu husi MS rejeita.
Antes nee Eis Primeiru Ministru (PM), Rui Maria de Araujo hatete, Makina CT Scan nee hanesan instrumentu ida atu halo diagnostiku hodi defini kursu ba tratamentu, liu-liu ba halo avaliasaun ba tratamentu sira neebe iha.
Makina CT Scan nee importante tebes, X-ray deit labele halo diagnosa neebe kredivel ba kondisaun pasiente sira nian, nunee presiza CT Scan, hodi hatene kondisaun sira.
Tanba nee presiza iha makina CT Scan neebe diak, atu bele iha funsionaliza ba saude publiku nian, oinsa bele halo diagnosa no halo tratamentu ba saude pasiente sira nian, atu doutor espesialista sira bele hatene moras refere iha pasiente sira nian isin lolon.
(EST 1)
