BAUKAU, STLTIMORLESTE.com – Ministeriu Asuntu Kombatentes Libertasaun Nasional (MAKLN) aloka orsamentu hamutuk rihun US$ 91, hodi reabilita eis edifisiu Komando Distrik Militer (KODIM) 1628 Baukau, neebe sei utiliza ba edifisiu Konselhu Kombatentes Libertasaun Nasional (CCLN) Munisipiu Baukau.
Tuir informasaun neebe STL asesu iha terrenu nota katak, eis edifisiu refere iha tempu kolonial português nuudar sede militar, maibe hafoin invazaun Indonezia iha tinan 1975, Autoridade Indonezia utiliza nuudar Sede KODIM 1628 iha Baukau, neebe okupa husi batalhaun infantaria 315 hodi utiliza sai sentru dadur, interogasaun, torturasaun nomos sai fatin ezekusaun ba gerilheiru Timoroan neebe luta ba ukun rasik aan.
Maibe iha tinan 2024 Governu liu husi MAKLN aloka ona Orsamentu Jeral Estadu (OJE) 2024 hodi reabilita no sei atribui ba Konselhu Kombatentes Libertasaun Nasional Munisipiu Baukau utiliza ba nesesidade trata asuntu kombatente sira.
Tanba edifisiu neebe antes nee Konselhu Kombatentes Libertasaun Nasional Munisipiu Baukau utiliza hodi atende asuntu kombatente sira medida la sufisiente hodi fo impkatu ba atendimentu.
“Projete reabilita nee gasta orsamentu rihun US$ 91, iha neeba kuartu hamutuk 5, salaun enkontru 1 ho varanda neebe sufisiente ami atu muda ba neeba hodi halo atendimentu,” hateten Sekretariu Konselhu Munisipal Kombatente Libertasaun Nasional Munisipiu Baukau, Manuel ‘Alari’ da Costa Soares ba jornalista sira iha Vila Antiga, Sesta (21/02/2025)
Projetu reabilita edifisiu refere, Governu kontratu kompanhia lokal ho naran Planalto Unip.Lda ho valor orsamentu rihun US$ 91 neebe hahu servisu iha fulan Julhu 2024 no termina iha loron 30 Dezembru 2024, maibe too ohin loron seidauk finaliza.
Tanba nee husu parte kompanhia atu aselera servisu hodi finaliza iha tempu besik, nunee bele utiliza ona ba atendimentu publiku asuntu kombatente sira.
Hatan ba kestaun nee, tekniku komapanhia Planalto Unip.Lda, Celestino Sambai iha terrenu rekonhese implementasaun servisu iha terenu tarde, tanba preokupa ho asuntu balu, maibe garante sei finaliza iha tempu besik hodi entrega ba Governu hodi utiliza ba nesesidade atendimentu publiku.
“Ami servisu hahu fulan Agostu, tuir lo-loos remata iha Dezembru, maibe iha preokupasaun badaen nia servisu entaun ami muda mai Marsu agora entrega, tanba ami garante ona atu finaliza,” Sambai argumenta.
Tekniku kompanhia nee relata, progresu fiziku reabilita edifisiu refere daudaun atinji ona liu 70%, tanba instalasaun fiu eletrisidade, plafon, taka kramik inklui pinta parede remara ona, maibe sei falta monta odamatan, janela inklui portaun tama no sai neebe remata sei entrega ba Governu iha fulan Marsu tinan nee.
(EST 2)
