DILI, STLTIMORLESTE.com – Oras nee daudaun Ministru ba Asuntus Kombatentes Libertasaun Nasional (MAKLN) ditribui ona fixa pagamentu nian ba benefisiariu sira hamutuk rihun lima atus hitu, sia nulu resin ida (5,791), sosiedade sivil husu presiza hadia sistema, nunee veteranus sira labele sena malu hodi simu sira nia direitu.
Sosiedade Sivil husi Asosiasaun HAK, liu husi Visi Diretor HAK Antonino de Limas ba jornalista iha knaar fatin Farol, Kuarta nee (07/01/2026) apresia Governu liu husi Ministru ba Asuntus Kombatentes Libertasaun Nasional, Gil da Costa Monteiro “Oan Soru ho ekipa ditribui ona fixa pagamentu ba benefisiariu sira hamutuk rihun lima, atus hitu sia nulu resin ida (5,791) maibe husu ba oin presiza kria sistema nunee inan aman vetaranus sira labele dudu malu ka hadau malu too balun monu.
Visi Diretor dehan, liga ho pagamentu ba veteranus sira iha fulan dezembru liu ba veteranus barak monu tanba forma sena malu, no atendimentu nee la diak.
“Atendimentu nee la diak, hau hanoin husi MAKLN hadia mekanizmu sira neebe iha, uluk sira nee ba mak trata livru banku nia maibe too ikus sira mak prepara hotu depois ba antrian. Kestaun mak nee, balun iha ona orariu maibe tanba sentraliza iha Dili entau nafatin difikulta ba sira atu simu sira nia osan, nee fila fali kestaun iha jestaun iha banku nomos maluk sira neebe halo servisu atendimentu presiza ema neebe iha konhesimentu diak atu organiza,” dehan Visi Diretor Hak.
Nia hatutan, prosesu pagamentu konsentra hotu Dili, ida nee mos bele difikulta ba prosesu sira, tanba nee mak nafatin husu hadia mekanizmu sira atu nunee labele halo sofre inan aman veteranus sira hodi hamriik kleur simu osan.
“Husu ba Banku Nossa Futuru atu prepara, tanba dokumentus ou fixa ohin temi nee eziste hein halo orariu ba munisipiu sira ka ho naran, tanba naran iha sistema ona, nunee pagamentu nee bele lao karik banku foun nee labele rezolve, bele ho fali banku seluk,” dehan Visi Hak.
Jornalista: Emerenciana Pinto
