DILI, STLTIMORLESTE.com – Governu liu husi Ministeriu Asuntu Kombatentes Libertasaun Nasional (MAKLN), distribui ona fixa pagamentu ba Kombatentes sira hamutuk 4.000 resin.
Iha loron Segunda-feira, loron 15 fulan-Dezembru nee, hahu abertura Pagamentu Pensaun Veteranus faze da-huluk nian ba benefisiariu hamutuk 15.697 husi territoriu nasional.
Husi total benefisiariu neebe mak naran tama iha lísta pagamentu faze da-huluk, mai husi Lista Edital Kombatentes Rejistadu iha Segundu-rejistu 2009 nian.
“Tuir dadus, durante loron-ualu halo atendimentu, Tenikus Diresaun Nasional ba Pensaun no Subvensoens (DNPS) konsege distribui fixa pagamentu nian ba benefisiariu sira neebe elejivel hamutuk rihun-haat resin (4.000 resin),” haktuir nota komunikadu neebe STL asesu husi media MAKLN, Kuarta (24/12/2025).
Iha Kuarta-feira, ohin loron, 24 fulan-Dezembru tinan 2025, Tekniku sira atende deit iha loron sorin ka hahu husi tuku 08:00 dadeer too tuku 12:00, oras meiudia, tanba ferias nasionais iha ambitu selebrasaun Festa Natal tinan 2025 nian neebe monu iha loron 25 fulan-Dezembru.
MAKLN liu husi espasu ida-nee, hakarak apela ba Inan-Aman Kombatentes, Veteranus no Familia Martir sira hotu katak, iha sesta-feira, semana nee, loron 26 fulan-Dezembru (bainrua), laiha atendimentu. Tekniku sira sei halo fali atendimentu iha semana oin, Segunda ho Tersa, 29 too 30 Dezembru 2025.
“MAKLN hakarak apela nafatin ba benefisiáriu sira neebe atu mai foti fixa pagamentu nian iha DNPS, keta haluha, lori nafatin ho dokumentu importante sira (kartaun eleitoral, billete identidade, sertidaun kazamentu no sertidaun baptizmu), hodi nunee tekniku sira bele komprova no halo re-atualizasaun iha Sistema baze dadus,”
Durante loron-ualu, distribuisaun fixa pagamentu nian ba benefisiariu sira, Tekniku sira hetan seguransa masima husi Komandu Polisia Nasional Timor-Leste (PNTL).
Jornalista: Alberto Menezes
Editor: Xisto Mendonça
