DILI, STLTIMORLESTE.com – Ministru Asuntu Kombatente Libertasaun Nasional (MAKLN), Gil da Costa “Oan Soru”, inaugura uma husi Veteranu Antônio Augusto “Murak” neebe mak lokaliza iha Suku Cassa, Munisipiu Ainaro.
Minstru Asuntu Kombatente Libertasaun Nasional, Gil da Costa “Oan Soru” apresia ho veteranu “Murak” tanba konsege maneja ho diak.
“Hanesan membru governu louva ba veteranu Antonio Augosto “Murak” maski la hatene hakerek no la hatene lee, maibe bele jere osan ho diak no aumenta tan nia osan privadu hodi finaliza uma refere, maski ho oan nain sanulu resin haat maibe konsege jere osan ho diak ho jestaun nee diak tebes. Mai ita sira neebe agora daudaun tur iha instituisaun estadu tenki basa liman ba ema sira neebe la hatene hakerek, maibe ho pensamentu nee diak hodi jere no maneja osan ho diak. Dalar ruma ita mos labele halo,” hatete Oan Soru liu husi Komunikandu neebe STL asesu, iha loron Tersa (22/10/2024).
Uma nee rasik konstrui tanba hetan apoiu husi governu liu husi Ministeriu Asuntu Kombatente Libertasaun Nasional, governu apoiu orsamentu montante rihun US$ 40 no orsamentu rihun US$ 10 resin husi veteranu Antonio Augosto “Murak” ho total orsamentu rihun 57 resin hodi finaliza uma refere.
Governu liu husi MAKLN apoiu orsamentu ba Veteranu Antonio Augosto “Murak” tanba haree ba veteranu “Murak” nia dedikasaun luta ba Timor Leste nia ukun rasik aan durante tinan 24 hodi reziste iha ailaran.
Governu dignifika veteranu Antonio Augosto “Murak” hanesan kombatente ba libetasaun rai ida nee nia.
Uma nee rasik ho medida 9×10, uma modelu andar ho kuarta 8, kompostu husi kuartu 2 iha kraik no kuartu 6 iha leten, konstrusaun uma refere hahu iha loron 4 Dezembru 2022.
(mar)
