DILI, STLTIMORLESTE.com – Ministeriu Asuntu Kombatentes Libertasaun Nasional (MAKLN) ho Ministeriu Petroleu Rekursu no Minerais (MPRM), asina akordu ba Memorandum of Understanding (MoU), hodi hametin kooperasaun servisu, oinsa bele dezenvolve nasaun Timor Leste (TL).
“Ita agradese tebes ba kooperasaun entre ministeriu rua nee halo, atu hametin prosesu dezenvolvimentu ho sustentavel, tanba luta ba libertasaun nasional nee presiza ita hotu nia luta.” dehan Ministeriu Asuntu Kombatentes Libertasaun Nasional (MAKLN), Gil Oan Soru liu husi nia diskursu, iha Salaun Tres de Marco Maubai, Komoro, Dili, Tersa nee (22/10/2024).
Nia dehan, asinatura ba MoU nee importante, hodi kesi konhesimentu tekniku, hodi hametin no fortalese ba sentidu unidade nasional, no atu reafirma ba sosiedade ida nee kulminante
Tanba nee husi kooperasaun nee atu hametin liu tan ba servisu sira nee, oinsa bele jere orsamentu sira husi Veteranu sira nian, nunee bele haree katak fundu veteranu bele selu tuir lei neebe iha.
“Ita agradese ba inisiativa husi parte rua nian, tanba bele hametin liu tan servisu sira nee ho diak, oinsa bele jere atividade sira neebe dezenvolvidu, no bele jere orsamentu sira neebe gasta ho montante boot, no kada tinan sempre lori montante boot, tanba nee husi servisu ida nee atu redus,” hatete governante nee.
Governante nee hatutan, fundu veteranu tinan oin bele redus, tanba osan nee laos Governu mak hasae, maibe lei mak fo autorizasaun, tanba nee fiar katak husi MoU ida nee bele lori ambiente foun, oinsa bele hatudu ho valor neebe diak ba povu Timoroan tomak.
“Mai ita hamutuk halo reflesaun ba buat hirak neebe lider rezistensia sira rai hela ba ita, tanba nee husi kooperasaun ida nee atu ita bele servisu hamutuk hodi organiza nesesidade hirak neebe fo satisfasaun ba estadu Timor Leste,” nia realsa.
Entretantu Ministru husi Ministeriu Petroleu Rekursu no Minarais (MPRM), Francisco da Costa Monteiro afirma, kooperasaun ida nee importante tebes, oinsa atu servisu hamutuk, hodi loke dezenvolvimentu nasional, liu-liu parte rua nee tenke haree ba objetivu ida, hanoin ida ba mehi neebe garante iha futuru.
Tanba haree katak husi servisu nee boot, entaun bele servisu hamutuk, tanba nee husu ba autoridade tomak atu mai ita luta hamutuk, oinsa bele estabiliza prinsipiu povu no nasaun nian, atu sai objetivu ida, oinsa bele alarga setor ekonomia ba dezenvolve sustentavel.
“Ita tenke tau atensaun ba setor ekonomia nian, atu bele objetivu no dudu knaar sira neebe iha, mezmu prosesu nee boot, maibe neineik ba beibeik sei haburas prinsipiu ekonomia ida neebe efetivu ba povu Timoroan tomak,” dehan nia.
(EST 1)
