DILI, STLTIMORLESTE.com – Prezidente Republika (PR), Jose Ramos Horta hatoo agradese ba Malazia neebe lori Timor Leste (TL) tama ASEAN iha fulan Outubru tinan nee.
Prezidente Republika, Jose Ramos Horta hatete, vizita Primeiru Ministru Malazia nian mai Timor Leste -nee laos deit formalidade diplomatika ida hanesan oportunidade ida atu hatoo ami-nia gratidaun sinsera ba Malazia nia amizade neebe la nakdoko no, liuliu, ba ninia kompromisu pesoal ba família ASEAN tomak hodi lori Timor-Leste tama iha laran.
“Saudasaun boas-vindas ida neebe kaloroza no sinsera iha Timor-Leste, belun doben, Dato Seri Anwar Ibrahim, Primeiru-Ministru Malazia nian. Vizita ida-nee laos deit formalidade diplomatika idahanesan oportunidade ida mai ami atu hatoo ami-nia gratidaun sinsera ba Malazia nia amizade neebe la nakdoko no, liuliu, ba ninia kompromisu pesoal ba família ASEAN tomak hodi lori Timor-Leste tama iha laran,” dehan Prezidente Republika, Jose Ramos Horta liu husi diskursu, iha salaun Multiuzu, Bebora, Tersa (23/09/2025).
Timor-Leste tuir Xefe Estadu sei la haluha Malazia nia apoiu iha momentu desizivu liu iha istoria resenteiha tinan 1999, durante Konsulta Popular, no iha tinan tranzisaun sira iha Nasoins Unidas nia auspísiu. Malazia nia soldadu sira, forsa polísia ho intervensaun lalais, pesoal mediku no funsionariu sivíl sira hamriik iha kabaas ida deit ho povu.
“Sira-nia profisionalizmu no empatia ajuda ami atu harii aliserse sira ba dame no estabilidade. No, iha dekada sira tuirmai, Malazia sai nafatin parseiru ida neebe ami fiar atu harii ami-nia Estadu iha edukasaun, saúde, komersiu, seguransa no diplomasia. Agora ami iha momentu istoriku ida nia rohanami-nia entrada ba tenda boot ASEAN nian,” hatete Xefe Estadu.
Aleinde ida nee Prezidente Republika hatete, aspirasaun ida-nee, neebe povu tane aas kleur ona, realiza daudaun tanba boa vontade koletiva husi membru ASEAN hotu-hotu, neebe reforsa husi sira-nia lideransa karizmatika.
Iha tinan ikus nee deit, Malazia finansia no apoia servisu Misaun nian iha Jakarta, fo formasaun no kapasitasaun teknika ba funsionariu Timoroan sira iha Kuala Lumpur no, ho laran-luak tebes, loke odamatan ba joven sira atu aprende diretamente husi esperiensia prezidensia Malazia nian iha ASEAN. Hirak nee laos jestu kiik ida-nee mak investimentu Timor oan nia futuru nuudar membru responsavel ba ASEAN.
“Ba ida-nee hotu, Anwar Ibrahim, Belun, Maun-alin, hau hatoo hau nia agradesimentu. Anwar Ibrahim ita maka estadista aziatiku ida neebe boot, lian moral ida iha mundu ida neebe dala barak laiha korajen moral no polítika,” katak PR Horta.
Iha tempu nakonu ho turbulensia, bainhira demokrasia no justisa hasoru ameasa sira, Ita-Boot nunka nakdoko hodi defende direitus umanus, liberdade no fraternidade entre povu sira.
Jornalista: Emerenciana Pinto
Editora: Carme Ximenes
