DILI, STLTIMORLESTE.com – Edukasaun Munisipiu Manatuto haruka ona lista profesores neebe tama idade reforma hamutuk 110, dadus nee hatama ona ba Rekursu Umanu Ministeriu Edukasaun.
Lia hirak nee hatoo husi Diretor Edukasaun Munisipiu Manatuto, Patricio da Cruz Quintao ba STL liu husi telefone, Tersa nee (22/10/2024).
“Husi Manatuto haruka ona lista ita nian profesores neebe mak tama ba idade reforma nee ba Rekursu Umanu Nasional, tanba lei reforma obrigatoriu nee mos ninia prosesu lao hela, neebe ita haruka ona lista nee ba ME, ho nunee Rekursu Umanu mak bele hatene liu total ita nian profesores nain hira mak atu tama ba idade reforma,” nia afirma.
Patricio dehan, maske profesor sira nee, sira nian idade too ona ba reforma, maibe too agora sira sei kontinua halo knaar hanesan edukador, neebe sira nafatin hanorin estudantes sira iha sala idak-idak. Total dadus profesores reforma neebe hatama ona Rekursu Umanu ME hamutuk 110, husi numeru nee feto 53, mane 57, dadus nee hatama iha tinan nee.
Nunee mos Diretora Rekursu Umanu iha ME, Anita Tavares Ribeiro de Jesus hatete, liga ba iha dadus reforma ninia, los duni katak Rekursu Umanu sempre simu lista neebe mak haruka mai husi Edukasaun Munisipiu sira, neebe foti iha idak-idak nian eskola, tanba profesores balun idade avansadu ona.
Entretantu Diretor Edukasaun Munisipiu Lautem, Anibal Fernandes hatete, sira nian profesores balun tama ba idade reforma no profesores balun moras no mate, nee duni ba oin presiza profesores.
(jac)
