DILI, STLTIMORLESTE.com – Komandante Vulnerable Person Unit (VPU) Nasional husu mane sira karik hetan violensia husi parseria feto bele hatoo keixa ba ministeriu relevante, tanba Violensia Bazeia ba Jeneru nee laos ba feto deit, maibe feto ho mane hotu.
Komandante VPU Nasional, Ricardo da Costa hatoo lia hirak nee liu husi nia intervensaun, bainhira halao enkontru Rede Referal iha salaun Maria Goreti, Kaikoli, Dili, Tersa (18/03/2025).
“Kazu sira ohin sua exelensia koalia kona-ba feto halo violensia hasoru mane, hau hanoin ami nia edefisiu VPU nee 24 oras halo atendimentu, maske tarde oituan maibe nafatin fo atendimentu, husu ba kolega mane sira mos hili direitu atu asesu ba justisa bele hatoo keixa,” dehan Komandante VPU nee.
Nia hatete, durante nee mane sira husi entranjeiru mak hatoo keixa, maibe mane Timor Leste iha nain ida deit mak keixa.
“Durante nee ema hatoo keixa nee ema estranjeiru mak halo keixa husi Pakistan, Bangladesh, sira nia ferik oan baku sira ba halo keixa, so ita Timor mak laiha, so ita Timor ida oan neebe akontese iha aitarak laran nee,” katak nia.
Iha biban nee, komandante husu ekipa rede referal sira bainhira tun halo sosializasaun iha terenu, nafatin enkoraja mane sira katak bainhira sai vitima bele hatoo keixa.
Nunee mos Sekretariu Estadu Igualdade (SEI), Elvina Sousa Carvalho hatete, koalia kona-ba Violensia Bazeia ba Jeneru, laos koalia deit kona-ba violensia neebe hasoru feto no labarik feto, maibe koalia mos kona-ba mane.
“Violensia Bazeia ba Jeneru nee laos koalia deit kona-ba violensia neebe hasoru ba feto no labarik feto, ita mos koalia kona-ba jeneru, feto no mane, nomos vuneravel ba kualker tipu de violensia neebe hasoru sira, ita hatete deit iha Timor kuandu mane hasoru violensia fizika ka violensia bazeia ba jeneru, kualker tipu de violensia mane sira lakohi koalia sai, tanba kulturalmente moe, tauk katak nia feen halo hela violensia hasoru nia,“ katak Sekretaria Estadu.
Nunee mos Akademista Rofina Soares hatete, mane sira sai vitima nee dala barak numeru nee kiik, tanba haree ba fizikamente mane sira forsa liu feto.
“No mane balu mos bele sai vitima husi feen sira, maibe sira moe hodi hatoo keixa, maibe lo-loos nee lei Violensia Bazeia ba Jeneru nee laos proteje deit feto no labarik feto, maibe proteje feto no mane hotu,” katak nia.
(eme)
