DILI, STLTIMORLESTE.com – Prezidente Republika (PR), Jose Ramos Horta hatete, estudante no sosiedade sivil halao manifestasaun durante loron 3 hasoru Parlamentu Nasional, laiha impkatu ba Timor Leste nia adezaun ba Association of Southeast Asian Nations (ASEAN).
Xefe Estadu dehan, estudante sira hatudu ezemplu ba iha mundu, tanba organiza ema barak maibe remata halo manifestasaun sira nain rasik hamos lixu iha fatin neebe sira halo demostrasaun ba ida nee hatudu ezemplu neebe diak ba ema seluk no mundu.
Maibe kona-ba manifestasaun neebe halo husi estudante no sosiedade sivil hasoru Parlamentu Nasional atu kansela sosa kareta ba Deputadu nain 65 nomos halakon pensaun vitalisia ida nee laiha impaktu ba Timor Leste nia adezaun ba ASEAN, tanba nasaun avansadu sira mos iha demostrasaun hasoru Governu no Parlamentu.
“La fo impaktu tanba problema sira nee akontese iha rai barak barak iha amerika loron loron, desde nova Yorke too Londres too neebe neebe, nee normal apezar ke iha violensia balun hau rona hau lee ke manifestante sira remata sira rasik mak hamos fali rai nee uniku iha mundu, manifestante sira fo lisaun boot ida ba ita hotu fo lisaun boot ida ba mundu, hau haree no lee hau kontente no admira,” katak Prezidente Republik, Horta.
Ho asaun estudente sira nian, horikalan Prezidente Republika koalia ho ema boot sira mai husi rai liur neebe mai Timor katak, joven neebe halo manifestansaun nee hatudu ezemplu tanba sira remata halo asaun pasifiku sira rasik halo limpeza kedas.
“Remata sira mak nain hamosu diak liu fali dala ruma ita halo atividade oin oin iha Dili laran, kuandu atividade remata lisu oin oin namkari nein ema ida preokupa, mais estudante sira halo manifestasaun nee fo ezemplu diak ba hotu hotu,” dehan Xefe Estadu.
Entretantu tuir observasaun jornalista STL iha terenu haree katak, durante loron tolu bainhira estudante sira hemu no han hotu sira rai iha fatin lixu, no remata halo asaun pasifiku sira organiza malu hodi halo limpreza jeral remata mak sira fahe malu.
Jornalista: Emerenciana Pinto
Editora: Carme Ximenes
