DILI, STLTIMORLESTE.com – Manifestasaun neebe halao husi estudante sira mosu preokupasaun iha atuasaun autoridade seguransa PNTL hasoru manifestante sira, tanba nee Provedor Direitu Umanus no Justisa (PDHJ), Virgilio da Silva Guterres konsidera tenke mosu iha hanoin ida katak, manifestante laos inimigu polisia nian.
“Tenke mosu iha hanoin katak, manifestante sira nee laos inimigu Polisia nian, manifestante ezerse sira nia direitu Polisia halao sira nia dever hodi garante katak, ezersisiu konstituisional estudante sira nian sosiedade sivil sira nian, la perturba ordem publiku no bele hato sira nia aspirasaun ba iha Membru PN sira,” dehan Provedor Virgilio ba STL, iha Kaikoli, Dili, Kuarta (17/09/2025).
Tuir nia iha nee maka foin haree kona-ba manfestante sira nia ezejensia saida, se sira buka hasoru ho Deputadu sira fasilita atu sira nia porta voz tama ba hodi hato sira nia aspirasaun ba reprezentante povu nian iha PN.
Maibe kona ba kareta nian desizaun husi PN sai ona, se iha tan ezijensia sira seluk husu Deputadu ka Xefe Bankada sira neebe responsabel atu halo esplikasaun, tanba ida nee maka funsaun PN nian atu hatan ba ezijensia povu no sidadaun nian.
Iha fatin ketak, Juventude Loriku Asuwain, Francisco Mau -kura dehan, apresia ho joven sira neebe halo manifestasaun.
“Hau apresia ho joven sira nee primeiru sira uja sira nia direitu sivika nudar sidadaun diak proaktiva ba nia sidadaun, saida maka joven sira halo primeiru hanesan sidadaun jerasaun foun, louva sira nia nasionalizmu no patriotizmu signifika katak, saida maka ami halo iha periodu rejistensia agora sira halo kontinuidade atu luta ba ideia estadu neebe iha no objetivu neebe preve iha Konstituisaun,” dehan nia.
Nia dehan, Estadu ida neebe justisa defende Demokrasia defende transparansia boa governasaun hakarak hari Estadu Timor Leste ida neebe modernu, prosperu. Hanesan sidadaun sivika tenke kritika fo balansu, tanba sidadaun nia dever laos to deit iha elesaun.
Tanba manifestasaun neebe estudante sira halo hanesan kontrola sosial, laos iha Kampus Akademiku estuda no peskija deit, maibe sira mos iha sensibilidade ba sosiedade no nasaun nia progresu, tanba ita nia Konstituisaun preve ita Estadu demokratiku defende direitu no ema hotu nia liberdade.
Aleinde nee, Jurista Sergio Dias Quintas afirma, pais iha neebe deit iha kompromisu katak, manifestasaun devia halo ho forma pasifiku, organizadu no tuir lei, iha Timor Leste iha norma konstitusional artigu 42 neebe ita opta, maibe atu manifestasaun la diak, evita violensia.
“Atu manifestasaun lao ho paz para labele lakon nia sentidu manten expresa aspirasaun povu nian, entaun tenki evita violensia no kaer metin nafatin nia objetividade no responsabilidade,” dehan Jurista nee.
Jornalista: Terezinha De Deus
Editora: Carme Ximenes
