BAUKAU, STLTIMORLESTE.com – Manifestante sira nia luta atu halakon Pensaun Vitalisia ba deputadu sira, manifestante kumpri deit promete falsu neebe ukun nain sira lori sai materia festa demokrasia iha palku leten.
Aleinde manifestante sira nia luta hasoru Parlamentu Nasional relasiona sosa kareta foun ba deputadu sira, manifestante sira mos luta atu halakon lei pensaun vitalisia no seluk tan, tuir Padre Parokia Santo Antonio Baukau Manuel da Silva Ximenes, SDB katak, nee razoavel, tanba gasta ona orsamentu barak ba asuntu refere no elimina lei pensaun vitalisia inisia husi deputadu no ukun nain sira.
“Nee razoavel, tanba osan barak ita gasta deit ba viajen sira, no ida sira dehan hasai tiha vitalisia nee uluk sira mak promete ba povu, agora ikus mai la realiza, entaun ema lori ida nee hasoru fali ita katak uluk ita mak tafui tiha kabeen ita mak la kumpri fali, ida nee sira nia expresaun liberdade tomak sira expresa,” hateten Pe. Manuel ba jornalista STL iha Vila Antiga Baukau, Kuarta (17/09/2025).
Maibe Padre Parokia Santo Antonio Baukau nee husu manifestante sira atu mantein regras manifestasaun nian, no labele estraga fasilidade publiku sira neebe harii no sosa husi orsamentu povu nian.
Aleinde mos husu membru Polisia Nasional Timor Leste (PNTL) neebe daudaun fo seguransa ba manifestante sira iha areadores Universidade Nasional Timor Lorosa’e (UNTL) atu komprende liberdade expresaun hodi la hasoru manifestante sira ho asaun brutal, maibe hasoru ho fuan laran, tanba asaun neebe manifestante sira halo promete neebe uluk ukun rai sira hameno hela ba povu iha festa demokrasia, maibe depois ukun la realiza.
“Se hau la sala uluk Governu sira halo kampanha dehan lian povu mak lian Maromak, se povu maioria mak nia lian ida nee mak ita tau konsidera no tau pratika, se sira fo nia opiniaun laos atu kondena mais fo hanoin halao servisu ho diak nuudar sarani sidadaun fo prioridade ba povu nia moris oras nee prezisa,” Pe. Manuel sublina.
Padre Parokia Santo Antonio Baukau nee konsidera, asaun manifestasaun neebe realiza husi manifestante sira laos kondena ukun nain sira, maibe nuudar meius ida fo hanoin atu servisu povu neebe oras nee daudaun barak sei iha moris mukit nia laran.
Jornalista: Tomas Reis
Editora: Carme Ximenes
