DILI, STLTIMORLESTE.com – Too agora manorin barak seidauk koalia lingua português ho diak, tanba nee ba futuru tenke hetan formasaun neebe diak ba lian refere.
Liafuan nee hatoo husi Direitor Eskola Hotelaria no Turizmu Bekora, Charles F. Guterres ba jornalista STL iha nia knaar fatin Bekora, Segunda nee (05/05/2025).
“Lingua português tuir hau nian haree agora daudaun nee ita hetan progresu neebe mak ita bele dehan katak seidauk masimu, tanba ita haree ita nian manorin barak mak seidauk koalia lian português ho diak, iha nível português nee ita bele dehan katak, iha nível neebe mak sei baixu tebes-tebes. Depois iha parte edukasaun ninia politika de formasaun mos la konsisten, signifika katak se karik ita nian manorin sira nee, sira nian lingua português nee ladun diak, edukasaun tenke estabelese ona ninia formasaun neebe diak ba ita nian profesor sira,” nia afirma.
Nia dehan, bainhira professor sira nian progresu ba iha lian português nee ladun diak nee bele atu foti desizaun ruma, oinsa Ministeriu Edukasaun estabelese ninia politika ida neebe diak atu halo ema sira nee aprende lian português nee ho seriu, ezemplu profesor nee ninia portugues diak, ninia sertifikadu nee iha nível B 1 no B 2.
Iha Fatin seluk, Professor husi EBC Fatumeta, Feliciano Gusmao dehan, kona-ba lian português nee diak tebes, tanba durante nee profesores sira sempre uza lian ida nee ba iha ensinu aprendizajen, maibe estudantes sira nee mak ladun iha vontade neebe mak diak atu aprende lian refere.
“Mai hau, hau iha esperiensia iha tempu português nian kedas, neebe agora profunda tan deit ona hodi hanorin labrik sira, maibe tanba estudantes sira lakohi atu aprende, ida nee depende ba labrik sira, tanba profesor hanorin maibe labarik sira mak ladun iha vontade atu aprende,” nia esplika.
(jac)
