BAUKAU, STLTIMORLESTE.com – Bainhira manutensaun estrada urbana Baukau Vila remata, Servisu Jestaun Merkadu Munisipiu Baukau sei la fo espasu ba negosiante sira atu faan iha espasu publiku, liu-liu iha area Beskem no Vila Antiga.
Diretor Servisu Merkadu Munisipiu Baukau, Jerónimo Freitas rekonhese, negosiante balun kontinua faan iha espasu publiku, liu-liu iha merkadu tuan Beskem besik rotunda Vila Nova, tanba kauza husi kondisaun estrada publiku diresaun ba merkadu Munisipal Tuanau.
Maibe daudaun kompanhia implementador projetu iha hela terenu halo manutensaun ba kondisaun estrada aat sira, nunee prosesu manutensaun remata sei koloka negosiante neebe faan okupa espasu iha Beskem ba merkadu Munisipal Tuanau.
“Nia impaktu mak estrada nee, maibe kuandu cor hotu kedas too leten vendedores sira nee hotu-hotu ba ona leten. Ami muda hotu sira iha Vila Antiga no rotunda sae hotu ba leten,” hateten Jerónimo ba STL iha Vila Nova, Baukau, Kinta (10/04/2025).
Bainhira prosesu manutensaun estrada remata mak iha negosiante neebe hakarak kontinua faan iha merkadu tuan Beskem no Vila Antiga Ekipa Guarda Munisipiu sei la tolera, tanba iha regras ba espasu publidezenvolvimentu, maibe husu negosiante sira atu koopera ho Autoridade Munisipiu Baukau iha prosesu dezenvolvimentu.
Dirijente nee katak, komentariu husi negosiante merkadu Munisipal Tuanau ba Autoridade Munisipiu Baukau muda negosiante haree husi kor familia nee laloos, tanba ekipa kontinua monitoriza negosiante sira, maibe negosiante neebe faan iha merkadu tuan Beskem, faan hahu iha tuku 18:00 loraik liu oras servisu.
“Informasaun neebe sira pasa nee laloos, ami hotu-hotu servisu ho fuan no laran hodi haree ba ami nia inan aman sira muda ba leten, laiha ema ida haree ba kor familia,” Jerónimo argumenta.
Diretor nee konfesa, prosesu muda negosiante husi merkadu tuan ba merkadu Munisipal Tuanau, ekipa konjunta la haree husi kor familia, maibe trata negosiante hotu hanesan, tanba hotu-hotu Baukau oan.
Aleinde nee mos Jestaun Merkadu Munisipiu Baukau planu ona sei rekruta pesoal seguransa hodi destaka iha merkadu Munisipal Tuanau hodi asegura negosiante sira nia sasan liu husi hein iha portaun tama no sai.
Nia katak, planu neebe iha sei rekruta ema nain sanulu ba seguransa oras 24 nian, maibe ho tipu rotativu, nain 5 tama oras 12 loron no nain 5 tama oras 12 kalan.
Negosiante Agostinha Sarmento katak, bainhira kondisaun estrada diak prontu atu fila ba faan iha merkadu Munisipal Tuanau.
“Ami mai faan iha nee tanba ema la sae ba merkadu foun sosa sasan, maibe estrada diak ona ami bele sae fali ba,” nia hateten.
Negosiante nee argumenta, durante faan iha merkadu Munisipal Tuanau la hetan rendimentu diak, tanba laiha kompradores, neebe impaktu husi kondisaun estrada la fasilita movimentu transporte too merkadu, tanba kondisaun aat, maibe liu husi prosesu manutensuan bainhira remata bele fasilita ona movimentu transporte hodi tula kompradores too iha merkadu Tuanau kompra negosiante sira nia sasan.
Enkuantu motorista transporte publiku diresaun Vila Antiga-Vila Nova hatete, duranre movimentu transporte neebe nia konduz la too merkadu Tuanau, tanba kondisaun estrada aat, nunee too deit iha area Hospital Rejional Eduardo Ximenes Baukau.
“Kuandu estrada diak ona hau ho hau nia maluk sira bele tula pasajeiru too iha merkadu foun, maibe estrada mak hanesan nee nafatin ami la halai ba neeba,” hateten motorista Lino.
Motorista nee husu parte kompanhia atu aselera prosesu manutensaun estrada, tanba daudaun kontinua fo impaktu ba movimentu transporte publiku no privadu diresaun Vila Nova ba Hospital Rejional Eduardo Ximenes.
(tom)
