DILI, STLTIMORLESTE.com – Ministeriu Agrikultura Pekuaria Peskas no Florestas (MAPPF) asina kontratu ho PT. Minarta Dutahutama ba projetu konstrusaun irigasaun Maliana II, neebe lokaliza iha Suku Tapo Memo, Postu Administrativu Maliana, Munisipiu Bobonaro.
“Orsamentu ba asina kontratu konstrusaun irigasaun nee ho montante US$9,886,820.81, osan ba konsultan US$ 805,100.00, durasaun ba kontratu nee durante fulan 30 ka ita bele dehan tinan 2 ho balu,” hatete Ministru Agrikultura Pekuaria Peskas no Florestas (MAPPF), Marcus da Cruz ba jornalista sira iha Komoro, Segunda nee (28/10/2024).
Esforsu sira nee hotu tuir governante nee nia objetivu atu hasae produsaun laos ba deit haree, maibe ba batar, modo nomos animal, tanba bee nee importante ba buat hotu neebe moris, ba ema, animal nomos ba ikan, bainhira halo konstrusaun ba irigasaun nee hotu, bee sei tama barak iha natar, natar sei modifika oituan para bele moderniza sistema Agrikultura.
Tanba tuir nia, irigasaun Maliana II konstrui iha tempu Indonezia ho sistema Free Intake, no irigasaun nee kleur ona ladun funsiona ho diak sempre hetan problema iha ninia fasilidade sira mak hanesan hamosu sendimentu, rai henek, fatuk, ai no tahu ten neebe sempre nakonu iha kanal nia laran wainhira mosu inundasaun, odamatan lafunsiona kuandu sendimentu nakonu, tanba laiha fasilidade kontrola sedimentassun, nunee mos moru protesaun hetan estragus husi inundasaun.
Iha fatin hanesan, Diretor PT. Minarta Dutahutama, Usman Lameko hatete, “ami agradese ba Maromak neebe kbiit boot liu hotu, neebe halibur ami dadersan no halao serimonia asina kontraktu Governu TL liu husi MAPPF no PT. Minarta Dutahutama ba Projeitu Konstrusaun irigasaun Maliana II,” dehan nian.
Nia dehan, projetu ida nee tenke halo ho kualidade, remata tuir tempu neebe asina ho MAPPF, selu mos tuir nesesidade neebe iha.
(joa)
