BAUKAU, STLTIMORLESTE.com – Governu liu husi Ministeriu Agrikultura Pekuaria Peskas no Floresta (MAPPF) entrega ekipamentus agrikultura ba Autoridade Munisipiu Baukau.
Ministru Agrikultura Pekuaria Peskas no Floresta, Marcos da Cruz hateten, Nonu Governu Konstitusional iha politika atu krese numeru produsaun agrikola nunee Timor Leste bele iha auto sufisiente ba aihan, tanba nee Governu kontinua moderniza sistema agrikultura liu husi konstrusaun irigasaun sira neebe balu finaliza ona konstrusaun no balu kontinua iha prosesu konstrusaun.
Maibe atu moderniza liu tan, mak Governu kontinua sosa ekipamentus sira hahu husi traktor boot no kiik, inklui makina sira ba kuda hare no koa hare nian atu minimiza gastos tempu agrikultores sira nian ba servisu iha natar no toos laran.
“Servisu iha setor agrikultura nee todan, dala ruma ema dehan tansa sa produsaun la aumenta, produsaun la aumenta tanba sira servisu deit ho ensada, aisuak no katana, tanba nee maun boot Xanana dehan tenke moderniza ajuda ita nia agrikultura sira nia kbiit servisu iha natar no toos, tanba nee meius ida mak ita fo apoiu,” Ministru Marcos hateten liu husi nia diskursu iha seremonia entrega ekipamentus agrikultura ba Autoridade Munisipiu Baukau neebe realiza iha resintu Servisu Administrasaun Munisipal Baukau, Segunda (19/01/2026).
Governante nee katak, ajuda neebe Governu responde liu husi MAPPF mak entega ona ekipamentus agrikultura ba Autoridade Munisipiu Baukau hanesan, traktor boot kompleta ho atraladu, makina kuda hare no koa hare.
Ministru Marcos komenta, makina kuda hare nee sei ajuda liu tan komunidade agrikultores sira nia despensa, tanba prosesu kuda haree servisu todan ida neebe agrikultores sira infrenta. Nunee mos traktor boot neebe iha kompleta ona ho atraladu atu ajuda tula sai komunidade agrikultores nia hare iha tempu koilheta, tanba iha tempu koilheta hare nian mos dala ruma akontese udan, nunee traktor boot neebe kompleta ona ho atraladu atu tula sai komunidade agrikultores sira nia hare husi natar laran ba fatin seguru.
Aleinde mos makina koa hare nian iha vantajen diak ba komunidade agrikultores, tanba makina refere kombina servisu 3 mak hanesan koa, dulan no ense rasik hare kulit ba karon laran ho kondisaun moos.
“Ita hakarak makina sira nee uza ho diak se bele ita halo natar dala 2, se bee menus ona kuda fali modo, ita hakarak servisu beibeik servi ba ita nia nasaun,” Ministru Marcos enkoraja.
Iha fatin hanesan, Prezidente Autoridade Munisipiu Baukau, Veneranda Lemos hateten, ekipamentus agrikultura nian neebe Governu liu husi MAPPF entrega ba Autoridade Munisipiu Baukau sei utiliza servisu ho diak nunee bele iha rezultadu produsaun.
“Ita agradese Governu nia prioridade ba Agrikultura, tanba nee ita laos agradese ba Governu tanba deit ita simu sasan, maibe ita nia agradesementu tenke transforma atu halo produsaun, ita simu makina sira nee bainhira ita halo produsaun ida nee mak ita agradese, laos agradese deit ba ekipamentus neebe fo ba ita,” Veneranda espresa.
Ekipamentus neebe Ministeriu Agrikultura Pekuaria Peskas no Floresta enrega ba Autoridade Munisipiu Baukau kompostu traktor marka kubota boot unidade 2 ho nia implementu sira hanesan, sarua ida, rotariu 2 no atraladu ida. Apoiu seluk tan mak hanesan makina kuda hare unidade 12 ho raga biveirus 3600 neebe kada makina ho raga biveirus 300, nomos apoiu makina koa hare nian hamutuk unidade 5 neebe iha tinan 2025 entrega uluk ona unidade 2 iha Suku Seiçal, Postu Baukau Vila.
(tom)
