BAUKAU, STLTIMORLESTE.com – Departementu Formasaun no Kapasitasaun husi Ministeriu Agrikultura Pekuaria Peskas no Floresta (MAPPF), fo formasaun ba extensionista sira iha Munisipiu Baukau, atu pratika agrikultura diak (PAD) ba agrikultores sira iha baze.
Xefe Departementu Formasaun Kapasitasaun, Salvador Fernandes Ribeiro hateten, pesoal extensionista sira nia papel, tanba extensionista mak transformador no motivador ba komunidade agrikultores sira, iha nivel Suku hodi krese numeru produsaun iha rai laran.
Nunee Ministeriu Agrikultura Pekuaria Peskas no Floresta liu husi Diresaun Nasional Extensaun no Informasaun Agrikultura no Departementu Formasaun no Kapasitasaun, iha obrigasaun fasilita formasaun ba extensionista sira iha territoriu nasional inklui extensionista sira iha Munisipiu Baukau, hodi kontinua motiva komunidade agrikultores sira iha baze hodi bele halo redusaun ba produtu importadu sira.
“Ami fo formasaun pratika agrikultura diak neebe objetivu ita fo formasaun ba extensionista nee prinsipal mak atu hasae extensionista sira nia koinhesementu iha area tekniku, tanba extensionista nia papel halo akompanhamentu agrikultor sira iha suku ida ida, molok sira halo akompanhamentu diak ba ita nia agrikultor sira primeiru sira tenke iha koinhesementu natoon,” Salvador Fernandes Ribeiro hateten ba jornalista sira, hafoin sesaun intervalu iha atividade formasaun ba extensionista sira iha Vila Nova, Baukau, Tersa (18/11/2025).
Nia sublina, formasaun Pratika Agrikultura Diak refere foku ba komuniti 3, mak hanesan prosesu kuda hare, foremungu no hakiak fahi no planu sei kontinu fo formasaun ba extensionista sira iha Pratika Agrikultura Diak ba komuniti seluk tan iha futuru, tanba extensionista mak save ba komunidade agrikultores sira hodi aumenta numeru produsaun, maibe extensionista balu iha nivel edukasaun mininu.
Nunee liu husi kapasita refere atu ajuda liu tan extensionista sira bainhira too iha baze bele esplika no intruduz pratika agrikultura pekuaria ba komunidade agrikultores sira, hodi bele iha koinhesimentu aumenta numeru produsaun reduz produtu importadu.
Iha fatin hanesan extensionista Sebastião dos Santos Belo konsidera, formasaun Pratika Agrikultura Diak importante tebes, tanba liu husi formasaun refere mak bele aumenta extensionista sira nia konhesimentu, hodi motiva komunidade agrikultores sira iha baze hodi Pratika Agrikultura diak aumenta numeru produsaun iha rai laran.
“Formasaun ida nee halao durante loron 3, ida nee sai hanesan bukaen ida ba ami, atu nunee halo akompanhamentu ita nia grupu sira iha baze, treinamentu nee tipu animal no hare kontribuisaun rendimentu komunidade sira nian” Sebastião katak.
Formasaun pratika agrikultura diak realiza iha edifisiu Servisu Extensionista Vila Nova, Baukau neebe hetan partisipasaun husi extensionista sira halao servisu iha Munisipiu Baukau.
Jornalista: Tomas Reis
Editora: Carme Ximenes
