DILI, STLTIMORLESTE.com – Governu Timor Leste liu husi Ministeriu Agrikultura Pekuaria Peskas no Floresta (MAPPF) hetan apoiu husi Menzies Timor Leste, hodi lansa Konstrusaun Laboratoriu Veterinaria Unidade Bakteriologia hodi kombate moras animal iha Timor Leste.
Sekretariu Estadu Pekuaria, Jose Veira de Araujo hatete, objetivu husi lansamentu konstrusaun nee atu konbate moras animal hodi hasae produsaun animal ba tinan 2023 ate 2028 nian.
“Objetivu husi lansamentu ida nee, durante tinan hirak nia laran ita iha moras animal lao namanas los, tanba nee iha politika Governu Konstituisional hakarak hasae produsaun animal ba 20% iha tinan lima nia laran, hahu husi 2023 too 2028, tanba nee iha objetivu sira balu ita hakarak hasae produsaun, maibe iha parte balu moras animal aperta beibeik, entaun saida mak ita halo, entaun ita ho politika koopera Menzies halo lansamentu ba projetu ida nee,” hateten Sekretariu Estadu Pekuaria, Jose Veira de Araujo iha Vila Verde, Dili, Kinta nee (20/03/2025).
Nia dehan, Governu iha politika atu harii Laboratoriu Veterinaria ba iha munisipiu sira hotu atu kombate ba iha moras animal nian, maibe atu harii projetu hirak nee depende ba iha ezekusaun orsamentu mai husi Governu.
Enkuantu Governu nee mos enome Governu Timor Leste hakarak apresia no agradese los Menzies neebe liu husi Governu Australia hodi fo apoiu ba konstrusaun laboratoriu refere.
Iha fatin hanesan, Country Manager Menzies, Antonio Gonsalves hatete, Menzies iha Timor Leste liu husi programa Fleming Fund nuudar programa asistensia husi Reinu Unidu neebe jere husi Departamentu Saude Animal nian, neebe estabelese ona atu apoia nasaun sira hodi kria, fahe no uza dadus rezistensia antimicrobiu (AMR) atu nunee sira bele optimiza uzu husi antibiotikus no hamenus rezistensia ba aimoruk.
(EST 3)
