BAUKAU, STLTIMORLESTE.com – Padre Parokia Sagrada Coração de Jesus Vila Nova, Benediktus Randung hateten, Ministeriu Agrikultura Pekuaria Peskas no Floresta (MAPPF) presiza motiva povu halo natar.
Tuir padre nee katak, iha periodu tinan 2025 Governu liu husi kompanhia internasional hahu konstrui ona irigasaun Uatuwa, Suku Gariuai, Postu Administrativu Baukau Vila ho eskalaun modernu nunee mos irigasaun ida iha Suku Vemasi, Postu Vemasi neebe daudaun kompanhia sira halo ona servisu ba konstrusaun irigasaun 2 refere.
Aliende mos inisiu tinan 2026 iha loron 10, fulan Janeiru ofisialmente Governu inagura irigasaun modernu 2, ida iha Munisipiu Lautem no ida iha Munisipiu Baukau neebe lokaliza iha Suku Hatu-haco, Postu Venilale.
“Entaun ita prezisa eduka ona povu, tanba estudu investe osan ba iha irigasaun iha nia objetivu atu ita la depende beibeik fos husi rai liur mai,” hateten Pe. Benediktus Randung ba STL iha nia knaar fatin Vila Nova Baukau, Kuarta (21/01/2026).
Padre nee konsidera, irigasaun hirak nee Governu esforsu hodi konstrui atu kore Timor-Leste nia dependensia ba fos importadu sira, maibe atu kore dependensia refere Governu mos presiza motiva komunidade agrikultores sira tinan ida halai natar dala tolu, atu nunee bele iha estok neebe sufisiente hodi hatan ba nesesidade komunidade sira iha territoriu nasional.
Maine bainhira Governu liu husi Ministeriu relevante la motiva komunidade agrikultores sira atu halai natar iha tinan ida dala tolu mak, komprimisiu neebe iha atu kore aan husi fos importadu nee susar, tanba komunidade agrikultores iha Timor-Leste maioria toman tinan ida halai natar dala ida.
“Presiza eduka povu nee katak presiza muda mentalidade, tanba ita toman ita nia povu mak nee, halai dala ida ba han deit, entaun ita tenke sosializa hakarak ga lakohi ita nia ekonomia rasik iha rai laran labele hein tan ema seluk, atu nunee estadu investe liu husi irigasaun nee folin duni ba povu no nasaun nee,” Pe. Randung sujere.
Nia katak, prezisa motiva no muda komunidade agrikultores sira nia mentalidade liu husi sosializasaun atu nunee komunidade iha mentalidade neebe diak hodi reforsa Governu responde ekonomia iha rai laran, tanba irigasaun neebe konstrui ho valor orsamentu boot no orsamentu povu nian, maibe la motiva komunidade agrikultores sira atu halai natar mak, orsamentu sira neebe aloka ba konstrui irigasaun laiha folin, tanba laiha rezultadu aihan sufisiente iha Timor-Leste ba tinan naruk.
Maibe bainhira Governu motiva komunidade agrikultores sira mak tinan ida halai natar dala tolu no iha rezultadu diak, Governu tenke sosa hafoin faan iha merkadu nasional nunee komunidade agrikultores sira bele sente iha benefisiu diak.
Liga asuntu nee, STL tenta konfirma Diretor Servisu Munisipal Agrikultura Baukau, maibe laiha fatin atu fo komentariu.
(tom)
