DILI, STLTIMORLESTE.com – Eis Primeiru Ministru Atual Sekretariu Jeral Partidu FRETILIN, Mari Alkatiri hatete, konseitu dezenvolvimentu neebe mak implementa seidauk iha balansu, tanba povu sei halerik ba edukasaun, saude, bee moos no seluk tan.
“Tuir hau nia konseitu dezenvolvimentu seidauk seidauk iha balansu, tanba edukasaun la lao, saude lalao, ekonomia povu nia laiha, laos balansu deit maibe seidauk iha dezenvolvimentu osan mak ita gasta barak ona, Primeiru Ministru rasik dehan tinan 4 mai osan laiha ona nee deklarasaun ninian laos hau nia,” dehan Sekretariu Jeral Partidu FRETILIN, Mari Alkatiri ba jornalista sira iha salaun Farol, Dili, Kuarta (27/08/2025).
Fundador RDTL nee mos hakfodak bainhira dehan dezenvolvimentu konsentra iha Dili maibe tuir nia haree dezenvolvimentu nee seidauk lao. “Hau la hatene se iha kapital Dili iha dezenvolvimentu hau hakfodak dehan fali dezenvolvimentu konsentra iha kapital Dili, dezenvolvimentu saida povu kiak nee hela iha kapital Dili, povu neebe haknauk han buat ruma hela iha kapital Dili, se hela iha foho sira iha toos ruma natar ruma iha buat ruma para han nee mak dehan dezenvolvimentu iha kapital Dili, hau nia konseitu dezenvolvimentu nee sentru ba dezenvolvimentu povu nia vida laos estrada no uma andar bobot,” dehan Fundador RDTL nee.
(eme)
