DILI, STLTIMORLESTE.com – Eis Prezidente Autoridade Rejiaun Administrativu Espesial Oekusi Ambeno (RAEOA), Mari Alkatiri hamutuk ho eis Prezidente Autoridade RAEOA, Arsenio Bano marka prezensa iha Ministeriu Publiku (MP), Kolmera, iha loron Segunda (24/11/2025).
Eis PA, Mari Alkatiri too iha Edefisiu MP mais ou menus iha oras tuku 9:00 dader, akompanha husi Advogadu Privadu Arlindo Sanches hodi tama ba iha edefisiu MP nia laran, ba ho karreta Privadu numeru matrikula A.16.954.
No eis PA Arsenio Bano too iha MP, mais ou menus oras tuku 10 resin, depois tama kedan ba iha Edefisiu MP laran, ho karreta privadu numeru matrikula APB 2323.
Hahu husi oras tuku 9:00 too iha oras tuku 12 liu minutu balu, foin remata delijensia no eis PA, Mari Alkatiri sai husi sala MP nian hodi fila.
Banhira eis PA, Mari atu fila, Jornalista tenta konfirma ba iha nia parte, kona-ba prejensa iha MP nia parte dehan, lakohi koalia.
“Hau labele koalia. Situasaun kuandu iha Ministeriu Publiku la iha publisidade, nee lei maka bandu hau, “hateten eis PA nee, bainhira sai husi sala MP nian.
Aleinde nee, eis PA, Arsenio Bano sai husi sala MP iha oras tuku 2 ho balu, nia parte mos lakohi fo razaun kona-ba prezensa iha MP, tanba lei maka hateten.
Eis PA, Mari Alkatiri akompanha husi nia Advogadu Privadu Arlindo Sanches, no Arsenio Bano akompana husi Advogadu Privadu Marselo da Roza.
Tuir informasaun neebe asesu, eis PA nain rua marka pejensa iha edefisiu MP nian, kona-ba deskonfia ligasaun ho fornesimentu bee moos iha Atauro neebe integra iha projetu ZEESM, neebe ikus mai sem relatoriu.
Iha tinan 2014, Governu Timor Leste lansa projetu ida atu fornesi bee-mos ba komunidade Atauro, neebe parte husi ZEESM. Projetu nee sei fo benefisiu ba populasaun Atauro, inklui fornesimentu bee ba fatin publiku sira hanesan sentru Saude, Igreja no Eskola.
Jornalista: Terezinha De Deus
Editora: Carme Ximenes
